Dowladda Somaliya oo ka digtay Ciidamo ay sheegtay Kenya inay ku hubeynayso Mandera

Dowladda Federalka Somaliya ayaa waxa ay ka digtay Ciidamo sida la sheegay lagu hubeynaayo Magaalada Mandhera ee dalka Kenya.

Qoraal ka soo baxay Wasaaradda Warfaafinta dowladda Federalka Somaliya, ayaa lagu sheegay Kenya in looga digaayo dhaqdhaqaaqa ay ka wado xadka si loo soo weeraro Magaalada Beled Xaawo & Saldhigyada Ciidamada halkaasi ku leeyihiin.

Qoraalka digniinta ah ee ka soo baxay dowladda Federalka Somaliya ayaa sidan u qornaa.

Dowldda Federaalka Soomaaliya waxay si dhaw ula socotaa abaabulka militari ee ay Dowladda Kenya maalmahan ka waddo aagga Mandera iyada oo hubeynaysa jabhad ay si sharci darro ah dalkeeda ugu martigelisay si xasillooni darro looga abuuro gudaha Soomaaliya.

Dowladda Federaalka Soomaaliya waxay ogaatay in Ciidamada Kenya ay hub iyo maleeshiyaad kusoo daad gureysay magaalada Mandera si duullaan loogu soo qaado magaalada Beled Xaawo iyo saldhigyada Ciidanka Xoogga Dalka Soomaaliyeed ee aaggaas ku yaalla.

Dowladda Federaalka Soomaaliya waxay uga digeysaa Dowladda Kenya ficillada gurracan ee ay ku wiiqayso nabadgalyada guud ee Gobolka Geeska Afrika, waxayna mar kale ku celinaysaa in ay Kenya ka fiirsato faragelinta qaawan ee ay ku hayso arrimaha gudaha Soomaaliya oo ay ka dhalan karto xasillooni darro saameyn ku yeelata amniga Gobolka.

Dowladda Federaalka Soomaaliya waxay qaadeysaa tallaabo kasta oo ay ku xaqiijinayso madaxbannaanideeda siyaasadeed, wadajirkeeda dhuleed iyo ilaalinta sharafka iyo karaamada shacabka Jamhuuriyadda Federaalka Soomaaliya.

Nagala soo xiriir dhacdo@gmail.com