Jahwareer ka dhashay weerar ciyaartoyda KG loogu gaystay Muqdisho

Waxay ahayd dhacdo dad badani ka yaabisay markii uu soo baxay warka sheegaya in Magaalada Muqdisho lagu weeraray bas ay la socdeen ciyaartoyda kooxda Koonfur Galbeed.

Baska ayaa lagu weeraray agagaarka Garoonka Injineer Yariisow, waana wax yar ka dib markii ay soo idlaatay ciyaartii galabta garoonkaasi ku dhex martay kooxaha Banaadir iyo Koonfur Galbeed, oo 3-1 ay guusha ku raacday kooxda Gobolka Banaadir.

Wararka ayaa sheegaya in weerarkaasi loo adeegsaday dhegxaan, ayna ku dhaawacmeen tiro ka mida ciyaartoyda kooxda Gobolka Banaadir, oo la geeyay Isbitaalka Digfeer.

Gudoomiye Kuxigeenka Dhinaca Siyaasadda iyo Amniga ee Maamulka Gobolka Banaadir, Cali Cabdi Wardheere (Cali Yare) iyo masuuliyiin kale oo ka tirsan Maamulka Koonfur Galbeed ayaa isbitaalka ku booqday ciyaartoydaasi.

Cali Yare ayaa sheegay in weerarkaasi uu u muuqday mid loola dan lahaa ciyaartoyda Gobolka Banaadir, maadaama ciyaartoyda kooxda Koonfur Galbeed ay saarneyd bas uu leeyahay Maamulka Gobolka Banaadir.

Dhanka kale hay’adaha ammaanka ayaa wada baaritaan la xiriira weerarka Magaalada Muqdisho loogu gaystay ciyaartoydii Maamulka Koonfur Galbeed ku meteleysay tartanka koobka kubadda cagta ee Dowlad Goboleedyada iyo Gobolka Banaadir.

Ma cadda ujeedada loo beegsaday ciyaartoyda Koonfur Galbeed, dad badanina waxay ku jahwareersan yihiin sababta ay bartilmaameed u noqdeen.

Waa weerarkii ugu horeeyay oo ceynkiisa ah Caasimadda Muqdisho loogu gaysto ciyaartoyda, tan iyo markii tartankan laga bilaabay dalka, dhawr sano horteed.

Nagala soo xiriir dhacdo@gmail.com