AMISOM oo shaacisay halka xukunka lagula fulin doono, askartii la xukumay

Taliska AMISOM ayaa ka hadlay xukunada kala duwan ee isugu jiray toogasho iyo xarig kaas oo dhawaan lagu riday askartooda.

AMISOM waxay sheegtay in askartan lagu helay dambiga ah in dad rayid ah ay ku laayeen deegaanka Golweyn ee Gobolka Shabellaha Hoose.

AMISOM ayaa sidoo kale sheegtay in askartan dib loogu celin doono dalka Uganda halkaas oo lagu fulin doono xukunada kala duwan ee lagu riday.

War saxaafadeed kasoo baxay Amisom ayaa lagu sheegay in ay mas’uuliyad ka saaran tahay ilaalinta amniga shacabka iyo hantida marka ay howlgallada ka fulinayaan gudaha Soomaaliya.

Dhacdada oo ahayd bishii August ee sannadkan, waxaa lagu dilay toddobo qof oo shacab ahaa, waxaana la sheegay in qaarkood lagu dul fadhiisiyay miino, ka dibna lagu qarxiyay.

Laba ka mid ah askartii la soo eedeeyay oo u dhashay Uganda ayaa lagu xukumay dil, halka seddaxda kalena lagu xukumay min 39 sano oo xabsi ah.

Nagala soo xiriir dhacdo@gmail.com