Ciidanka NISA oo hawlgalo ka sameeyay Beled Xaawo (SAWIRRO)

Ciidanka Hay’adda Nabad Sugidda Qaranka ayaa hawlgalo amni xaqiijin ah ka sameeyay qaybo ka mida xaafadaha Degmada Beled Xaawo ee Gobolka Gedo.

Goobaha ay ciidmadu hawlgalada ka sameeyeen waxaa ka mid ah Suuqa Beled Xaawo, halkaasoo la arkayay iyagoo dusha ka eegaaya gaadiidkii suuqaasi dhex marayay.

Lama soo sheegin cid ay ciidamada uga shakiyeen falal amni-darro, oo ay ku soo qabqabteen hawlgaladaasi, intii ay wadeen.

Dowladda Somaliya ayaa bishii March ee sanadkii 2020, markii ugu horeysay cutubyo ka tirsan Xoogaga NISA waxaa ay gaysay degmadaasi, waana billo ka dib doorashadii dib loogu soo doortay Madaxweynaha Jubbaland, Axmed Maxamed Islaam (Axmed Madoobe).

22-kii bishii December ee sanadkii 2021 ayay ahayd, markii askari ka tirsanaa Ciidamada NISA lagu qisaasay degmadaasi, ka dib markii laba wiil oo dhallinyaro ahaa uu bishii November ku dilay degmada xuduudda dhacda.

Nagala soo xiriir dhacdo@gmail.com