Turkiga oo gantaalo ku garaacay dalka Ciraaq

Telefishinka Dowladda Ciraaq ayaa sheegay in sideed qof oo ay ku jiraan labo carruur ah ay ku dhinteen, 23- kalena ay ku dhaawacmeen, kad ib markii Ciidamada Turkiga ay ku garaaceen madaafiic Gobolka Zaho ee waqooyiga dalkaasi.

Mushir Bashir oo ah masuul ka tirsan gobolka ayaa Wakaaladda Wararka AFP u sheegay in dadka dhintay ay u badnaayeen dalxiisayaal ka yimid bartamaha iyo koonfurta dalkani.

Mushir Bashir ayaa sheegay in tuuladooda in laba jeer ay kusoo dhaceen madaafiic.

“Madaafiicda Turkiga ayaa sideed qof ku dilay, 23 kalana way ku dhaawacmeen deegaan loo dalxiis tago ee Parakh,” sida uu sheegay Bashir.

Sarkaal katirsan ismaamulka Kurdida, ayaa sidoo kale sheegay in shan qof ay ku dhinteen dabka. Bashir waxa uu intaa ku darey in dalxiisayaashu ay u yimaadeen tuulada buuraleyda ah ee Parakh, si ay uga badbaadaan kuleylka ba’an ee ka jira koonfurta dalka Ciraaq.

Amiir Cali oo ka tirsan saraakiisha caafimaadka, ayaa sidoo kale warbaahinta u sheegay in dadka dhintay ay ku jiraan saddex rag ah, iyo saddex dumar ah iyo sidoo kale labo carruur ah.

Ilo wareed ka tirsan Wasaaradda Difaaca Turkiga oo la hadlay AFP ayaa sheegay inuusan waxba kala soconin madaafiicda lagu garaacay goobta.

Turkigu ayaa tan iyo bishii April waday hawlgalka Claw-Lock ee ka dhanka ah xubnaha PKK ee waqooyiga Ciraaq.

Nagala soo xiriir dhacdo@gmail.com