Mareykanka oo Ukraine ugu yaboohaya hub uu qiimihiisu gaarayo hal bilyan oo dollar

Dowladda Mareykanka ayaa ballanqaaday taageero dheeri ah oo militari inay siin doonto Ukraine, si dowladda dalkaasi ay isaga caabiso duulaanka Ruushka.

Hubkan oo isugu jira gantaalo, rasaas iyo saanad kale ayay Wasaaradda Gaashaandhigga Mareykanka (Pentagon) ka soo uruurisay kaydka hubka ee dalkaasi.

Taageeradan militari oo ay ku kaceyso hal bilyan oo dollar ayaa la sheegaya inay Ukraine ka caawin doonto in ay ka hortagto duulaanka sii fidaya ee Moscow.

Tani oo noqoneyso taageeradii ugu ballaarneyd ee Washington siiso Kyiv ayaa waqtiga dhow loo daabuli doonnaa dalkaasi.

Dhanka kale Aqalka Cad ayaa taageero maaliyadeed oo dhan afar dhibic shan bilyan oo dollar ($4.5b) oo toos ah siinaya Ukraine, isagoo u sii marinaya Bankiga Adduunka.

Wakaaladda Horumarinta Caalamiga ee Mareykanka ayaa bayaan soo saartay ku sheegtay in lacagtani loogu talagalay in ay Ukraine u adeegsato adeegyada lagama maarmaanka ah, oo ay ku jiraan kaalmada bulshada iyo kabka dhaqaale ee dalkaasi, kaas oo wiiqmay tan iyo markii uu Ruushku weeraray dalkaasi.

Bayaanka ayaa lagu sheegay in dadka reer Ukraine ay wajahayaan nolol saboolnimo ah, isla-markaana ay xaalad adag la soo deristay dadka ku barakacay gudaha dalkaasi.

Nagala soo xiriir dhacdo@gmail.com