Kooxo hubeysan ayaa caawa Magaalada Muqdisho ku dilay Wasiiru Dowlihii Wasaaradda Gaadiidka & Duulista Hawada ee Galmudug, Farxiya Cabdi Maxamed.
Kooxahan ayaa haweeneyda ku toogtay Degmada Warta Nabadda (Ex Wardhiigley), iyagoona dilka ka dib ka baxsaday goobtaasi.
Haweeneydan ayaa waxa ay ka mid ahayd Golihii Wasiirada ee 5-tii bishii December uu magacaabay Madaxweynaha Galmudug, Axmed Cabdi Kaariye (Qoorqoor).
Madaxweyne Qoorqoor ayaa ka tacsiyeeyay geerida marxuumadda, isagoona dilkeeda ku eedeeyay kooxaha argagixisada.
Farxiya Cabdi ayaa door weyn ku laheyd abaabulka gulufkii ballaarnaa, ee ay ciidamadu 16-kii bishan kula wareegeen gacan ku haynta Degmada Xarardheere ee Gobolka Mudug.
Ma jirto cid sheegatay masuuliyadda dilkeeda, waxaase si dhow loola xiriirinaya maleeshiyada Al Shabaab.
Nagala soo xiriir dhacdo@gmail.com