Ururka Xisbullah ee dalka Lubnaan ayaa xalay xaqiijiyay geerida Mohammad Afif, ka dib markii Israel ay Axaddii shalay ku dishay weerar xagga cirka oo ay ka fulisay Magaalada Beirut.
Xisbullah ayaa war ay soo saartay ku sheegtay in Madaxii Xafiiska Warfaafinta, Mohammad Afif lagu dilay duqayn lagu garaacay dhisme ku yaala bartamaha Beirut.
Dhismahan uu weerarku ka dhacay ayaa ahaa Xafiiska Xisbiga Suuriya ee Baath (Ba’ath) ee laantiisa dalka Lubnaan.
Wasaaradda Caafimaadka Lubnaan ayaa sheegtay in duqayntaasi lagu dilay hal qof, saddex kalena ay ku dhaawacantay.
Mohammad Afif ayaa ahaa codka Xisbullah, tan iyo intii ay colaaddan dib uga soo dhex cusboonaatay Xisbullah iyo Israel, waana ninkii soo saarayay warbixinada ay Xisbullah ku faah faahineyso weerarada ay ku hayso Ciidamada Israel ee duulaanka ku soo qaaday xuduudda dalkaasi iyo duqaymaha ay ka gaysanayaan gudaha Israel.
Taliska Militariga Israel oo bilowgii diiday inay ka hadlaan duqaynta lagu dilay ninkaasi ayaa bayaan ay xalay shaaciyeen ku sheegay in Afif uu door weyn ku lahaa hawlgalada militari ee Xisbullah. Bayaanka ayaa lagu sheegay in uu Xoogaga Xisbullah ku dhiirigelin jiray weerarada ka dhanka ah Israel.
Marka laga soo tago eedeynta Israel, Afif ayaan lahayn door militari oo cad, marka laga soo tago inuu qaabilsanaa qaybta baahinta wararka.
Warbaahinta ayaa fahamsan in Afif uu ahaa nin aan is qarin, isagoo ka warqabay in ay dagaal adag ku jiraan, waxaana uu caan ku ahaa shirarkiisii jaraa’id ee Caasimadda Beirut.
Beirut ayaa noqotay meesha ugu badan ee lagu ugaarsado Saraakiisha sarsare ee Ururka Xisbullah, iyadoona tan iyo bishii September lagu dilay Saraakiil muhiim u ahayd ururkaasi, oo uu ku jiro Hassan Nasrallah, Hoggaamiyihii Ururka Xisbullah.
