Xildhibaanada Baarlamaanka Jubbaland ayaa maanta ogolaaday in muddo xileedka Madaxweynaha laga dhigo shan sano, halka uu afar sano ka ahaa.
Xildhibaanada Baarlamaanka oo kulan ku yeeshay Magaalada Kismaayo ayaa u codeeyay wax ka bedel lagu sameeyay qodobada qaar ee Dastuurka Jubbaland.
Sidoo kale Xildhibaanada Baarlamaanka ayaa mid aan xididneyn ka dhigay inta jeer ee Madaxweynuhu uu isu soo taagi karo jegada madaxtinimada ee maamulka.
Dastuurka ayaa horey u qeexayay in Madaxweynuhu uu laba jeer oo keliya uu isu soo taagi karo xilka madaxtinimada ee maamulkaasi, taas oo hadda laga dhigay mid aan muddeysneyn. Tani ayuu macnaheedu yahay in Madaxweynaha ay mar kastaba u furan tahay inuu u tartami karo Xafiiska Madaxtooyada.
Qodobada wax ka bedelka lagu sameeyay ayaa waxaa ka mid ah qodobka 65aad ee Dastuurka Jubbaland, kaas oo caddeynayay in muddada xilheynta Madaxweynaha ay tahay afar sano, balse hadda laga dhigay shan sano iyo qodobka 70aad oo isna qeexayay in Madaxweynuhu aanu xilka u tartami karin wax ka badan laba jeer, haddase laga dhigay mid furan.
Tani ayaa u suurtagelinaysa Madaxweyne Axmed Maxamed Islaam (Axmed Madoobe) in markii saddexaad uu haatan u tartami karo Madaxtooyada.
Axmed Madoobe ayaa 22-kii bishii August ee sanadkii 2019 dib loogu soo doortay Madaxweynaha Jubbaland, ka dib doorasho ka dhacday Magaalada Kismaayo.
Mucaaradka Jubbaland ayaa maalmahaanba ka biyo diidanaa qorshaha wax ka bedelka ee muddada xilheynta Madaxweynaha iyo inta jeer ee uu xilka u tartami karo.
