Madaxweynaha Mareykanka, Joe Biden ayaa gelinkii dambe ee Jimcihii Aqalka Cad ku qaabilay Raysal Wasaaraha Ingiriiska, kaas oo booqasho ku jooga Magaalada Washington.
Madaxweynaha Mareykanka iyo Raysal Wasaare Keir Starmer ayaa ka wada hadlay colaadda Ukraine, Gaza iyo taageerada xulafadooda Indo-Pacific.
Labada hoggaamiye ayaa si dhow uga wada hadlay dalabka uga Ukraine ee ku aaddan inay qaadaan xayiraadaha Kyiv ka saaran in gantaalahooda ridada dheer lagu weeraro bartilmaameedyada militari ee gudaha Ruusha.
Ukraine ayaa muddooyinkanba codsaneysay in gantaalaha ridada dheer ay ka heshay reer galbeedka loo adeegsado hadafyada militari ee dalka Ruushka.
Madaxweyne Biden ayaa sheegay in dalkiisa ay ka go’an tahay in Ingiriiska uu ku garab istaago taageerada dalka Ukraine, si ay isaga caabiyaan duulaanka Ruushka.
Madaxweyne Biden ayaa carabka ku adkeeyay in Hoggaamiyaha Ruushka aanu ku adkaan doonin dagaalka Ukraine.
Geba-gabadii kulanka, Raysal Wasaaraha Ingiriiska oo wax laga weydiiyay inuu Biden ku qanciyay in gantaalahooda loo adeegsan karo gudaha Ruushka ayuu sheegay in ay isaga iyo Biden yeesheen kulan wax ku ool ah.
Inkastoo uu ujeedka kulanka uu ahaa, sidii wax ka bedel loogu samayn lahaa siyaasadda reer galbeedka ee Ukraine ayaa waxaa haddana jirin wax ballanqaad ah, oo Biden iyo Starmer ay u sameeyeen Dowladda Ukraine, si ay u garaacdo dhulka Ruushka, iyadoo beegsaneysa Saldhigyada Ciidamada Ruushka iyo garoomada ay ka soo kacaan diyaaradaha dagaalka ee duqaymaha ka wada dalka Ukraine.
Madaxweynaha Ukraine, Volodymyr Zelensky ayaa mar sii horreysay sheegay inay baahi weyn u qabaan ogolaanshaha xulafadooda reer galbeedka.
Madaxweyne Zelensky ayaa sheegay in dalkiisu aanu gaari karin guusha dagaalka, isla-markaana ay guushooda ku xiran tahay in la qaado xayiraadda gantaalahaasi.
Vladimir Putin, Madaxweynaha Ruushka ayaa Khamiistii ka digay in gantaalaha reer galbeedka lagu soo weeraro dalkiisa, haddii kalena ay noqon doonto in NATO ay si toos ah ugu lug leedahay dagaalka Ukraine.
Digniinta Putin ayaa loo maleynaya inay keentay sababta aysan Biden iyo Starmer wax go’aan ah uga soo saarin kulankoodii Washington.
Isbahaysiga NATO ayaa horey u sheegay inaysan dooneyn dagaal buuxa oo lala galo Ruushka.
Si kastaba ha-ahaatee Zelensky ayaa marar badan ku celceliyay in aqbalaadda codsigooda ay tahay midda keliya ee lagu soo afjari karo dagaalka dalkiisa. Zelensky ayaa sheegay in cadaadiskooda militari ay Moscow ku khasbeyso inay aqbasho heshiiska nabadda ee lagu soo afjarayo dagaalka Ukraine.
