Madaxweynaha Mareykanka, Joe Biden ayaa cambaareeyay weerarka uu Ruushku Talaadadii ka gaystay dalkaasi Ukraine, oo galaaftay nolosha 51 qof.
Ruushka ayaa gantaal nooca ballaastikada ah ku weeraray magaalada bartamaha Ukraine ku taala ee Poltava. Masuuliyiinta ayaa xaqiijiyay in weerarka ay ku dhinteen 51 qof, 271 kalena ay ku dhaawacmeen.
Weerarkan ayaa noqonaya mid ka mid ah weeraradii ugu dhiig daadashada badnaa ee ka dhaca dalkaasi, tan iyo markii Ciidamada Ruushka ay gudaha u galeen Ukraine, horaantii sanadkii 2022. 
Madaxweynaha Mareykanka ayaa Ruushka ku dhalleeceeyay inuu gantaal halis ah u adeegsaday Poltava, isagoona weerarkaasi ku tilmaamay mid laga xumaado.
“Weerarkani wuxuu xusuusin naxdin leh u yahay isku dayga xun ee Putin uu ku doonayo inuu ku jebiyo rabitaanka dadka xorta ah.” Ayuu yiri Madaxweyne Biden.
Madaxweyne Biden ayaa warsaxaafadeed uu xalay soo saaray ku sheegay in Washington ay sii wadi doonto taageeradeeda Ukraine, isla-markaana ay siin doonto nidaamka difaaca hawada ee ay u baahan tahay, si buu yiri ay isu difaacdo.
Weerarkan ayaa burbur u gaystay qayb ka mid ah Dhismaha Machadka Militariga ee Poltava, sida uu sheegay Madaxweynaha Ukraine, Volodymyr Zelensky.
Madaxweynaha ayaa sidoo kale sheegay in illaa 10 dhisme oo kale uu burbur ka soo gaaray weerarka, isagoo intaasi ku daray in burburka dhismayaasha laga baadigoobayo, haddii ay jiraan dad nool.
Madaxa Maamulka Militariga ee Poltava, Filip Pronin ayaa sheegay in masuuliyiintu ay rumeysan yihiin in illaa 18 qof ay ku hoos jiraan burburka dhismayaasha.
Madaxweyne Zelensky ayaa dalalka reer galbeedka weydiistay in ay kaalmo hor leh siiyaan dalkiisa, si ay isaga caabiyaan weerarada Ruushka.
“Nidaamyada difaaca hawada iyo gantaalaha ayaa looga baahan yahay Ukraine.” Ayuu yiri Zelensky oo codsaday in si degdeg ahi lagu la soo gaaro gantaalahaasi.
Poltava ayaa 350km jihada koonfur bari kaga beegan Caasimadda Kyiv. Magaalada waxaa mara jidka tareen ee isku xira Kyiv iyo magaalada labaad ee dalkaasi ugu weyn ee Kharkiv.