Wararka ka imanaya xuduudda Lubnaan iyo Israel ayaa sheegaya in Ciidamada Israel iyo Xoogaga Xisbullah uu dagaal culus ku dhex maray mid ka mid ah tuulooyinka Lubnaan ee ku yaala xuduudda.
Wararka ayaa sheegaya in dagaalku uu ka dambeeyay, ka dib markii Ciidamada Israel ay gelinkii dambe ee Sabtidii isku dayeen inay galaan tuulada Shama, oo saaran afka hore ee xuduudda Lubnaan ay la wadaagto Israel.
Ciidamada Israel oo taageero ka helaya diyaaradaha dagaalka ayaa iska caabin xoogan kala kulmay Xoogaga Xisbullah, isla-markaana ay ku adkaatay inay gudaha u galaan tuuladaasi.
Qiiq iyo uuro ayaa ka kacay goob ay Warbaahinta Israel sheegtay in diyaaradaha dagaalka ay garaaceen.
Xisbullah ayaa sheegtay in xoogageeda ay jilbaha u laabteen cadowga, dibna ay isaga caabiyeen.
Xisbullah ayaa war ay xalay soo saartay ku sheegtay in mid ka mid ah taangiyada Militariga Israel ay la heleen gantaalka lidka taangiyada, kaas oo ay sheegtay in lagu gubay meel dhanka bari kaga beegan duleedka tuuladaasi.
Ciidamada Israel ayay caqabad xoog leh ka haysataa xaqiijinta, waxa lagu sheegay istiraatiijiyadda dagaalka Tel Aviv ee la xiriirta in Xisbullah 30km laga dheereeyo deegaanada xuduudda, si ay halkaasi uga dhigaan goob nabdoon iyo in Israeliyiinta qaxday ay si ammaan ah ugu soo laabtaan deegaanada waqooyiga Israel.
Israel ayaa Arbacadii dhowr kun oo askari ku xoojisay ciidamadeeda ka dagaalamaya xuduudda, si dagaalka loo dardargeliyo.
Tani waxay ka dhigeysaa in Israel ay hadda in ka badan labaatan kun oo askari ay ka joogaan xuduudda, isla-markaana ay la dagaalamayaan Xoogaga Xisbullah.
Bil iyo bar oo dagaalkan uu socdo, Ciidamada Israel ayay u suurtagashay in marar kala duwan ay gudaha u galaan tuulooyinka xuduudda ee Lubnaan, balse aysan habeen keliya ku hooyan deegaan ay ka qabsadeen Xisbullah.
Naim Qassem, Hoggaamiyaha Ururka Xisbullah ayaa wacad ku maray inaysan aqbali doonin in Israeliyiinta ay ku soo laabtaan guryahooda, iyadoo aysan Tel Aviv joojin xasuuqa ay ka waddo Marinka Gaza.
Xisbullaahida Lubnaan oo xulafo la ah Ururka Xamaas ee Falastiin ayaa diidan weerarada ay Israel ku hayso dadka reer Gaza, waana sababta iyaga iyo Israel ay 18 sano ka dib ugu jiheysteen wareeg kale oo dagaal.
Dagaalkan ayaa ka saamayn badan midkii labada dhinac dhex maray bartamihii sanadkii 2006, kaas oo socday muddo 33 cisho ah.
Lama garanayo muddada uu socon doono dagaalkan, waxaase muuqata in cawaaqib ba’an uu ku yeelanayo shacabka labada dal.