Ciidanka Difaaca Israel ayaa waxaa Talaadadan u suurtagashay in ay 10km gudaha u galaan xuduudda Lubnaan, ka dib dagaal faraha looga gubtay oo halkaasi ay kula galeen Xoogaga Ururka Xisbullah.
Dhowr ka mid ah Guutooyinka Ciidamada Israel, oo ay ku jirto Guutada Kumaandooska ee Golani ayaa gaaray Wadi Saluki oo qiyaastii 10km u jira xuduudda iyo bariga Webiga Litani ee koonfurta dalkaasi Lubnaan. Aagga bariga ee webigaasi ayaa 4km u jira magaalada xuduudda Israel ku taala ee Metula.
Taliska Militariga Israel ayaa sheegay in ciidamadu ay xoog ku jiireen difaacyadii Ururka Xisbullah, isla-markaana ay si garbo siman laba jiho uga sii siqayaan koonfurta Lubnaan.
Taliska ayaa sheegay in ciidamadu ay sii socon doonaan, illaa iyo inta ay ka xaqiijinayaan hadafkooda dagaalka, oo ah in ay gaaraan waqooyiga Webiga Litani, si halkaasi looga saaro Ururka Xisbullah. Goobaha ay Xisbullah kaga sugan tahay qaybta waqooyi ee webiga ayaa illaa 30km u jira xuduudda.
Taliska ayaa bayaan ku sheegay in hawlgalka lagu burburiyay fariisimihii Xisbullah iyo tobanaan ka mid ah gantaaladeeda. Taliska kama aanay hadlin, haddii wada hadalada socdaa ay saamayn ku yeelan karaan hawlgaladooda iyo in kale.
Waa markii koowaad oo Ciidamada Israel ay dhulkaasi gaaraan, tan iyo markii Israel ay ciidamadeeda dalkaasi kala soo baxday sanadkii 2000.
Tani waxay kaloo noqoneysaa markii ugu horreysay oo Ciidamada Israel ay 10km gudaha u galaan dalkaasi, ka dib markii 1-dii bishii ina dhaaftay ee October ay bilaabeen hawlgalkooda dhinaca dhulka ee koonfurta Lubnaan.
Ku dhawaad laba bilood oo dagaalkan uu socday, Ciidamada Israel ayaa la dhibaatoonayay, sidii ay uga gudbi lahaayeen dhufeysyada hore ee Xisbullah.
Su’aasha ay dadku is weydiinayaan ayaa ah in ciidamadaasi ay gudaha ugu sii siqi doonaan koonfurta Lubnaan, inta ay ka gaarayaan waqooyiga Webiga Litani iyo inay dib ugu laaban doonaan xuduudda.
Janaraalada Israel ayaa horey u dejiyay qorshe dagaal oo ciidamadu ay 30km koonfurta Lubnaan kaga sameynayaan aag nabdoon, si Israeliyiinta barakaca uga maqan waqooyiga Israel ay si ammaan ah dib ugu soo laabtaan guryahooda.
Tobanaan kun oo Israeliyiin ah ayaa ku barakacay gantaalihii sanadkii la soo dhaafay isaga gudbayay dhulka xuduudda ee labada dal, isla-markaana ay is weydaarsanayeen Ciidamada Israel iyo Xoogaga Xisbullah.
