Shacabka Falastiiniyiinta ee ku nool Marinka Gaza ayaa maanta bilaabay inay dib ugu laabtaan guryahooda Khan Yunis iyo Deir Al-Balah, wax yar uun ka dib, markii ay isaga baxeen Ciidamada Israel.
Ciidamada Israel ayaa toddobaadyadii la soo dhaafay hawlgalo ballaaran ka waday deegaanka Khan Yunis ee koonfurta Marinka Gaza, iyagoona dagaalo culus kula galay Xoogaga Ururka Xamaas.
Sidoo kale Ciidamada Israel oo dhowr cisho hawlgalo ka waday deegaanka Deir Al-Balah ee bartamaha Marinka Gaza ayaa iska caabin xoog badan kala kulmay kooxaha wax iska caabinta Falastiiniyiinta.
Ciidamada Israel ayaa lagu eedeeyay in ay barakacin ballaaran ka sameeyeen Deir Al-Balah, oo hoy u ahaa qiyaastii hal milyan oo qof oo dadka reer Gaza ah.
Israel ayaa dib uga guratay deegaanadaasi, iyadoo aan ka ciribtirin kooxaha wax iska caabinta. Israel ayaa bilowgii sheegtay in ay ka sifeyn doonto kooxahaasi, balse uu ujeedku u muuqday in laga eryo dadka rayidka ah iyo hay’adaha gargaarka ee caawinaya.
Xafiiska Qaramada Midoobey ee Xiriirinta Arrimaha Bani’aadantinimada ee OCHA ayaa maanta sheegay in ka bixista Ciidamada Israel ee Deir Al-Balah ay ogolaan doonto in hay’ado badan oo kuwa gargaarka ah oo lagu khasbay inay ka baxaan deegaankaasi ay dib ugu laabtaan goobahoodii.
Stephane Dujarric oo ah Afhayeenka Xoghayaha Guud ee Qaramada Midoobey ayaa sheegay in Xarunta Howlaha Bani’aadantinimo ee Qaramada Midoobey ee Deir Al-Balah ay howsheedii dib u bilaabi doonto.
Qaramada Midoobey ayaa hawlgalkeeda ugu muhiimsan ee gargaar bixinta u wareejisay Deir Al-Balah, ka dib markii Ciidamada Israel ay bishii May hawlgal dhinaca dhulka ah ka bilaabeen deegaanka Rafah ee koonfurta Marinka Gaza.
Stephane Dujarric ayaa sheegay in amarkii 25-kii bishan ka soo baxay Taliska Militariga Israel uu carqaladeeyay howlihii Qaramada Midoobey ee Deir Al-Balah. Amarkan ayaa ahaa mid ay Israel dadka rayidka ah iyo hay’adaha gargaarka ugu sheegeysay inay ka guuraan deegaankaasi.
Dadka rayidka ah iyo hay’adaha caalamiga ah ayaa dib ugu laabanaya Deir Al-Balah, iyadoo ay ka arriminayaan kooxaha iska caabin, kuwaas oo aysan wax dhibaato ahi ku qabin.