Ugu yaraan labaatan qof ayaa la xaqiijiyay inay ku dhimatay, 450 kalena ay ku dhaawacantay qaraxyo maalintii labaad oo xiriir ah oo Arbacadii ka dhacay dalka Lubnaan.
Weerarkii Talaadadii ayaa lagu bartilmaameedsaday isgaarsiinta gacanta ee Xisbullah, teleefanada gacanta qaarkood iyo weliba computero, balse weerarkii galabnimadii Arbacada ayaa lagu qaaday aalado ka duwan kuwii hore.
Weerarkan ugu dambeeyay ayaa lagu beegsaday qalabka kale ee isgaarsiinta iyo aaladaha tamarka loo adeegsado, sida raadiyaha baabuurta, solarada qoraxda ku shaqeeya, qalabka guryaha qaar loo isticmaalo iyo weliba agab kale oo qalabka isgaarsiinta la xiriira.
Qaraxyadan ayaa si weyn u saameeyay goobaha lagu iibiyo qalabka elektoroonika ee Caasimadda Beirut, waxaana la arkayay xarumo ganacsi oo qarxaya, iyadoo aysan jirin weerar toos ah oo dibadda uga yimid.
Qaraxyadan ayay waxyeelada ugu badan ka soo gaartay dadka rayidka ah, mana jirin saamayn muuqato oo ay ku yeesheen Xoogaga Xisbullah.
Wasiirka Caafimaadka Lubnaan, Firas Abiad ayaa sheegay in weerarka teknolojiyadda ee ka dhacay dalkaasi ay ku dhinteen 20 qof, in ka badan 450 kalena ay ku dhaawacmeen.
Wasiirka ayaa sheegay in weerarkii Talaadadii ay ku dhinteen 12 qof, saddex kun oo kalena ay ku dhaawacmeen.
Wasiirka ayaa weeraradan ku eedeeyay Maamulka Israel, oo ugu talagalay sida uu sheegay inay dhibaateeyaan shacabka Lubnaan.
Dhanka kale gelinka dambe ee maanta ayaa lagu wadaa in Hoggaamiyaha Ururka Xisbullah, Hassan Nasrallah uu jeediyo khudbad uu kaga hadlayo xaaladihii ugu dambeeyay ee ka soo kordhay dalkaasi iyo farriintiisa ku aaddan in laga aarguto Israel.
Xiisadda Israel iyo Xisbullah ayaa gaartay meeshii ugu sarreysay, tan iyo markii Israel ay weerarka ku qaadday Marinka Gaza.
