Diyaaradaha dagaalka Israel ayaa saqdii dhexe ee xalay garaacay goob ay ku badan yihiin qoysaska barakacayaasha, iyadoona weerarkaasi ay ku dhinteen dad badan, kuwo kalena ay ku dhaawacmeen.
Ciidanka Cirka Israel ayaa bartilmaameedsaday teendhooyinka ay dadka barakacayaasha degan yihiin ee horaan laga dhisay deegaanka Al-Mawasi ee koonfurta Marinka Gaza.
Ugu yaraan 40 Falastiiniyiin ah ayaa lagu dilay weerarka xagga cirka ee ka dhacay Al-Mawasi, halka 60 kalena ay ku dhaawacmeen, sida ay xaqiijisay Hay’adda Difaaca Madaniga ee Marinka Gaza.
Dadka deegaanka ayaa sheegay in dhowr jeer la beegsaday xerada barakacayaasha ee ku taala deegaanka Al-Mawasi.
Hay’adda Difaaca Madaniga ayaa sheegtay in duqaymuhu ay aaseen teendhooyin badan, kooxaha samatabixintana ay baadigoobayaan, haddii ay jiraan dad nool. 
Israel ayaa horey Al-Mawasi ugu asteysay aag bani’aadantinimo, iyadoona dadkii ay ka barakacisay Rafah iyo Khan Yunis ku wargelisay in ay halkaasi gabaad u doontaan.
Taliska Militariga Israel ayaa sheegay inay bartilmaameedsadeen xarun hawlgal, oo ay leeyihiin Xoogaga Ururka Xamaas.
Xamaas ayaa si adag u beenisay warka Militariga Israel, waxayna ku tilmaamtay mid aan sal iyo raad toona lahayn.
Diyaaradaha dagaalka Israel ayaa Marinka Gaza ka gaysanaya duqaymo aysan u meel dayeynin, kuwaa oo dad fara-badan oo shacab aan waxba galabsan ay ku dhimanayaan.
Weerarada aan kala sooca lahayn ee ay Israel ka gaysaneyso Marinka Gaza ayaa liddi ku ah sahrciga caalamiga ah ee bani’aadantinimada iyo kan dagaalka.
Tirada dadka rayidka ah ee lagu dilay Gaza ayaa hadda kor u dhaaftay 41 kun oo qof, halka dhaawacuna uu ku dhow yahay 95 kun oo dad rayid ah.