Ugu yaraan sagaal qof ayaa la xaqiijiyay inay ku dhinteen, ku dhawaad afartan kalena ay ku dhaawacmeen duqayn ay diyaaradaha dagaalka Israel ka gaysteen Magaalada Tyre ee koonfurta dalkaasi Lubnaan.
Diyaaradaha dagaalka Israel ayaa xalay garaacay laba dhisme oo la deganaa, halkaas oo dhimashada iyo dhaawaca dadka rayidka ah ay ka dhasheen.
Wasaaradda Caafimaadka Lubnaan ayaa xaqiijisay in sagaal qof lagu dilay duqaynta, 38 kalena ay ku dhaawacmeen. Wasaaradda ayaa sheegtay in dumar iyo carruur ay ka mid yihiin dadka ku dhintay weerarka.
Shaqaalaha caafimaadka ayaa sheegay in ay goobta ka qaadeen meydka haweeney xaamili ahayd oo lagu dilay weerarka.
Labada dhisme ee la barbartilmaameedsaday ayuu burbur baahsan ka soo gaaray weerarka xagga cirka.
Militariga Israel ayaan weli ka hadlin sababta loo beegsaday dhismayaashaasi.
Militariga Israel ayaa marar kala duwan sheegay in ay weerar ku hayaan kaabeyaasha militariga iyo dhaqaalaha ee Xisbullah, balse dhibaneyaasha dagaalkan ayaa ah dadka rayidka ah, sida ay sheegtay Dowladda Lubnaan.