Faah faahino ayaa ka soo baxaya weerar ismiidaamin ah oo saaka ka dhacay agagaarka fariisimo ay Ciidanka Hay’adda Nabad Sugidda ku leeyihiin deegaanka Arbacow ee duleedka Magaalada Muqdisho, gaar ahaan aagga Waaxda Korneyl Cumar Fiyasko.
Wararka ayaa sheegaya in nin la socday gaari laga soo buuxiyay walxaha qarxa uu isku qarxiyay afaafka hore ee fariisimahaasi, ka dib markii ay ku adkaatay in uu xoog kaga gudbo. Goobtan ayaa ka mid ah barraha laga ilaaliyo amniga Caasimadda Muqdisho.
Fahad Salaad Maxamed oo ka mid ahaa Ciidanka Hay’adda Nabad Sugidda ee halkaasi degan, sidoo kalena darawal u ahaa Taliyaha Nabad Sugidda ee Qaybta Galbeed Gobolka Banaadir ayaa la sheegaya in uu isku dhigay gaariga, ka gadaal markii gaarigii ismiidaamiyaha uu la socday uu ka horgeeyay gaari Cabdi Bile ah.
Ilo wareedyadu waxay sheegayaan in Fahad Salaad oo goobta ku geeriyooday uu gaariga ku horjaray gaarigii ismiidaamiyaha, taasina ay adkeysay in uu goobta ka gudbo.
Wararka ayaa intaasi ku daraya in ciidamadu ay wax yar ka dib gantaalka garbaha laga tuuro ee baasuukaha/saban ku dhufteen gaari kale oo ay ka shakiyeen, balse gaariga oo walxaha qarxa ay ku rarnaayeen ayaa ku qarxay goobta, iyadoo aysan cidina waxba ku noqon.
Inkastoo laamaha amniga aysan weli ka hadlin khasaaraha uu gaystay qaraxii hore, haddana wararka ayaa sheegaya in ay ku dhinteen dhowr askari, oo uu ku jiro askari lagu magacaabo jiray Axmed Soomaali, kaas oo caan ka ahaa magaalada.
Dhanka kale Agaasimaha Hay’adda Nabad Sugidda & Sirdoonka Qaranka (NISA), Cabdullaahi Maxamed Cali (Sanbaloolshe) ayaa goor dhow kormeeray goobta uu qaraxu ka dhacay.
Agaasimaha Hay’adda NISA oo la kulmay Saraakiisha Ciidamada ayaa ammaanay, sida ay uga hortaggeen qaraxyadaasi.
Warbaahinta Dowladda ayaa sheegtay in qaraxyadaasi la doonayay in lagu dhibaateeyo shacabka reer Muqdisho.
Waa ismiidaamintii labaad ee ka dhacdo Muqdisho iyo nawaaxigeeda, wax ka yar 20 cisho. Ismiidaamintan tii ka horreysay ayaa 2-dii bishan lagu qaaday dad ku caweynayay Xeebta Liido. Sida ay Dowladda Federaalka sheegtay weerarkaasi ayaa galaaftay nolosha 37 qof, in ka badan 200 oo kalena ay ku dhaawacmeen.
