Hoggaamiyaha Ururka Xisbullah ee Lubnaan, Hassan Nasrallah ayaa gelinkii dambe ee maanta jeediyay khudbad la wada sugayay, ka dib markii labadii maalmood ee la soo dhaafay ay qarxeen qalab ay ku wada xiriirayeen dhowr kun oo qof, oo isugu jira Xoogaga Xisbullah iyo dad rayid ah.
Weeraradan ayaa galaaftay nolosha 37 qof iyo dhaawaca dhowr kun oo kale, oo ay ku jiraan boqolaal qof oo qaba dhaawacyo halis ah.
Hoggaamiyaha ayaa marka hore u mahadceliyay dhammaanba dadkii ka qayb qaatay dadaaladii loogu gurmanayay dhibaneyaasha, isagoona Dowladaha Ciraaq iyo Iran kaga mahadceliyay deeqda caafimaad ee ay dadka dalkaasi u fidiyeen. 
Hoggaamiyaha ayaa intaasi ka dib sheegay in Israel ay labadii maalmood ee la soo dhaafay isku dayday inay laba daqiiqo gudahood ku disho 5,000 oo qof, wuxuuna sheegay in qaraxyadan ay ahaayeen kuwo aan horey uga dhicin Lubnaan iyo caalamkaba.
Waxa uu Israel ku eedeeyay in aysan wax dan ah ka gelin nolosha dadka rayidka ah ee aan waxba galabsan, waxa uu intaasi ku daray in ay beegsatay illaa 4,000, oo ah isgaarsiinta gacanta ee lagu wada xiriiro ee Pager iyo Walkie-talkie. Qalabkan ayuu sheegay in ay adeegsanayeen dadka ku nool Lubnaan iyo Suuriya, ka hor inta aan Talaadadii iyo Arbacadii la beegsan.
Wuxuu sheegay in Israel ay Talaadadii damacday in ay isku mar disho afar kun oo qof, Arbacadiina uu qorshaheedu ahaa inay ka takhalusto kun kale, wuxuuna weeraradaasi ku tilmaamay kuwo ay Israel kaga gudubtay dhammaan khadadka cas.
“Kuwani waa dembiyo dagaal ama ugu yaraan ku dhawaaqid dagaal.” Ayuu yiri Hoggaamiyaha Xisbullah oo xusay in qayb ka mid ah qalabkan aysan shaqeyneyn maalmihii uu weerarku dhacayay, haddii kalena uu khasaaruhu ka badan lahaa inta hadda laga warqabo.
“Cadowgu waxay doonayeen inay dilaan shan kun oo qof, laakiin Ilaahay ayaa ku mahadsan oo khasaaraha aan ka dhigin, sidii ay qorsheynayeen.” Ayuu yiri Hoggaamiyuhu.
Hoggaamiyaha ayaa qiray in uu jab xoogan soo gaaray labadii maalmood ee la soo dhaafay, isaga oo maalmahaasi ku qeexay maamo ay culeys weyn dareemeen, balse ay diyaar u yihiin inay dib u soo kabsadaan.
“Qaraxyadu waxay ahaayeen dharbaaxo daran oo aan horey loo arag.” Ayuu yiri Hoggaamiyaha. Qirashadan waxaa lagu macneeyay mid la yaab leh oo aan horey ururka looga baran.
Hoggaamiyaha Xisbullah ayaa taageereyaashooda u xaqiijiyay in Israel ay ku guuldareysatay inay burburiso kaabeyaasha militari ee ururka, taasina ay awood u siineyso inay wajahayaan cadowga, sida uu yiri.
Hassan Nasrallah oo u jeestay farriintiisa Israel ayaa sheegay in Tel Aviv uu ku soo wajahan yahay dagaal xoogan, balse ma sheegin nooca dagaalkaasi, waxaase loo fasirtay inay si adag uga aargudan doonaan weeraradii la yaabka lahaa ee toddobaadkan ka dhacay dalkiisa.
Waxa uu wacad ku maray in Xisbullah ay sii wadi doonto dagaalka ay kula jirto Israel, illaa iyo inta laga soo afjarayo dagaalka muddada sanadka ku dhow ee ka socda Marinka Gaza.
“Lubnaan ma joogsan doonto, ka hor inta aan la joojin gardarrada Gaza.” Ayuu yiri Hassan Nasrallah.
Waxa kaloo uu sheegay in hawlgal militari iyo kororka ciidan ee Israel ee xuduudda uusan keeni doonin in si xoog ah guryahooda loogu soo celiyo Israeliyiintii ku barakacay xiisadda ka taagan xuduudda labada dal.
“Kuwani waxaan ugu yeernaa kuwa la deegaameeyay iyo kuwa qabsaday Falastiin.” Ayuu yiri Nasrallah oo hadalkiisa ku xoojiyay in sida keliya ee lagu soo celin karaa ay tahay in la soo afjaro gardarrada lagu hayo shacabka Falastiiniyiinta ee ku nool Marinka Gaza iyo Daanta Galbeed ee la haysto.
“Waxaad nagu xujeyseen inaan mar kale u soo kacno loolanka waxaana leeyahay Netanyahu iyo Gallant ma gaari doontaan hadafkan oo ma awoodi doontaan inaad dadkan ku soo celisaan waqooyiga. Sida keliya ee aad ku soo celin kartaan waa iyadoo la joojiyo gardarrada lagu hayo Gaza iyo Daanta Galbeed. Tani waa dariiqa keliya.” Ayuu yiir Nasrallah.
Hoggaamiyaha Ururka Xisbullah oo sii hadlayay ayaa yiri “Anigoo ku hadlaya magaca shuhadada, kuwa dhaawacmay iyo dhammaan kuwa ku dagaalamaya magaca Gaza, waxaan u sheegaynaa Netanyahu iyo Gallant in dagaalka Lubnaan uusan joogsan doonin, ka hor inta aan la joojin duulaanka Gaza.”
Hassan Nasrallah ayaa sheegay in Xisbullah aysan ka waaban doonin taageerada ay u fidineyso shacabka Falastiiniyiinta.
“Iska caabinta Lubnaan ma joojin doonto taageerada dadka Gaza iyo Daanta Galbeed.” Ayuu yiri Nasrallah.
Nasrallah ayaa ugu dambayn sheegay in Xisbullah ay rajeynayso in Ciidamada Israel ay duulaan dhinaca dhulka ah ku soo qaadaan dalka Lubnaan, taasoo fursad taariikhi ah u noqon doonta sida uu yiri dagaal-yahanadiisa.