Hoggaamiyaha Ururka Xisbullah, Naim Qassem ayaa sheegay inay dagaal adag kula jiraan Israel, dagaalkaas oo sida uu sheegay ay si weyn ugu diyaargaroobeen.
Hoggaamiyaha Ururka Xisbullah ayaa muuqaal uu soo duubay ku sheegay inay filayeen in dagaal uu dhici doono, isla-markaana ay horey ugu sii diyaargaroobeen.
Hoggaamiyaha ayaa tilmaamay in Israel ay dooneyso inay qabsato dalka Lubnaan, iyaguna ay ka difaacayaan in dhulkooda ay la wareegto.
Isaga oo sii hadlayay ayuu sheegay in Xisbullah iyo ururada kale ee iska caabinta gobolka ay ku taagan yihiin waddo sax ah, isla-markaana ay u taagan yihiin in dadka Bariga Dhexe laga difaaco cadowga, sida uu yiri.
Iska caabinta gobolka ayuu sheegay inay difaacayaan sharafta bulshada gobolka, si aan loo qabsan, loogana hortago gardarrada sida uu sheegay ee cadowga.
“Tobanaan kun oo dagaal-yahano ah ayaa diyaar u ah inay la dagaalamaan Israel, kuwaa oo aan ka baqeynin inay dhintaan amaba la dilo.” Ayuu yiri Naim Qassem, Hoggaamiyaha Ururka Xisbullah.
Hoggaamiyaha ayaa yiri “Waxaan haysanaa dagaal-yahano u diyaarsan inay ka hortaggaan cadowga, kuwaa uu leh tababar heer sare, haystana hub in ku filan.”
Waxa kaloo uu sheegay in Israel ay riixeyso in dagaalka uu daba dheeraado, iyadoo moodeysa inay kaga adkaan doonto iska caabinta.
Hoggaamiyaha Xisbullah, Naim Qassem ayaa afka ku ballaariyay inay diyaar u yihiin dagaal waqti dheer oo Israel ay la galaan, isaga oo intaasi ku daray in iyaga iyo Israel ay ku kala bixi doonaan goobta dagaalka.
“Israel waxay ku adkeysanaysaa in dagaalka uu dheeraado, si uu u noqdo dagaal furan, annagana diyaar ayaan u nahay. Waxa keliya ee dagaalka soo afjari kara waa goobta dagaalka.” Ayuu yiri Naim Qassem.
Naim Qassem ayaa xusay in iska caabinta aan looga guuleysan doonin dagaalka, Israel-na ay tahay midda ku khasaari doonto, sida uu yiri.
Qassem ayaa soo hadal qaaday in iyagu ay si buuxda u garab taagan yihiin dadka reer Gaza, isla-markaana ay ka soo horjeedaan xasuuqa ay Israel ku hayso shacabka Falastiin.
Hoggaamiyaha Xisbullah ayaa hadalkiisa ku xoojiyay in Israeliyiinta aysan heli doonin nabadda ay u baahan yihiin, inta dowladdoodu ay ku howlan tahay xasuuqa shacab dhan.
Dagaalka dhinaca dhulka ee Israel iyo Xisbullah ayaa galay toddobaadkii lixaad, iyadoo Ciidamada Israel iyo Xoogaga Xisbullah ay ku dagaalamayaan deegaanada xuduudda ee labada dal.
Dagaalka ayaa si weyn u saameynaya shacabka labada dhinac, iyaga oo dareemaya cawaaqibka dagaalkan.