Hoggaamiyaha Xuuthiyiinta Yemen, Abdul-Malik Al Houthi ayaa sheegay in dembiyada ay gaysaneyso Israel aysan noqon doonin kuwo aan loo ciqaabin maamulkaasi.
Hoggaamiyaha ayaa wacad ku maray in Israel ay la kulmi doonto jawaab xanuun badan, iyadoo loo aargudaayo Hoggaamiyihii Ururka Xamaas, Ismail Haniyeh, kaas oo 31-kii bishii hore ee July lagu dilay dalka Iran.
“Dhidibka wax iska caabinta waxaa hubaal ah inay fulin doonaan hawlgalka aargoosiga, kaas oo noqon doono mid wax tar leh oo xanuun badan.” Ayuu yiri Hoggaamiyaha Xuuthiyiinta.
Hoggaamiyaha ayaa tilmaamay in sababta dib u dhaca ay tahay, iyadoo si wanaagsan looga fekerayo nooca aargoosiga ee la doonayo in lagaga aarguto Israel.
“Qorsheynta taxadarka leh ayaa ka mid ah sababaha ka dambeeya dib u dhaca hawlgalka aargoosiga.” Ayuu yiri Abdul-Malik Al Houthi, Hoggaamiyaha Xuuthiyiinta Yemen.
Hoggaamiyaha oo Khamiistan khudbad uu jeediyay laga daawanayay telefishinka afka Xuuthiyiinta ku hadla ee Al Masirah ayaa carabka ku adkeeyay in hawlgalka aargoosiga uu noqon doono mid hufan oo xanuun badan, si Israel loo dareensiiyo cawaaqibka weeraradeeda aan ka fiirsashada lahayn.
Waxa kaloo uu sheegay in Israel ay hadda ka jirto cabsi iyo walaac weyn oo amni, xilli Iran iyo ururada hubeysan ee gobolka aysan weli wax jawaab ahi ka bixin dilkii Ismail Haniyeh.
Hoggaamiyaha Xuuthiyiinta Yemen ayaa Ururka Xisbullah ee dalka Lubnaan ku ammaanay inay sii wadaan weerarada ay garab istaagga ugu muujinayaan dadka reer Gaza.
“Hawlgalada ayaa si xowli ah uga socda koonfurta Lubnaan, Israel-na waxay sugeysaa jawaab lama huraan ah oo ka timaada iska caabinta Xisbullah.” Ayuu yiri Hoggaamiyaha Xuuthiyiinta oo daba socdo hanjabaadda Xisbullah ee ku aaddan in ay ka aargudan doonto dilkii ay Israel 30-kii bishii July u gaysatay Fu’ad Shukur, oo ahaa Abaanduulihii Garabka Militariga Xisbullah.
Sarkaalkan ayaa lagu dilay hawlgal xagga cirka ah oo diyaaradaha Israel ay ka fuliyeen duleedka Magaalada Beirut.
Dhanka kale Hoggaamiyaha Xuuthiyiinta ayaa ku hanjabay inay sii wadi doonaan weerarada maraakiibta ganacsiga ee ka socda Badda Cas iyo Gacanka Cadmeed, si ay u xoojiyaan taageeradooda shacabka Falastiiniyiinta.
Hoggaamiyaha ayaa xusay in illaa iyo hadda ay weerareen 182 markab, kuwaa oo lala xiriiriyay Israel iyo weliba maalgeliyeyaasha reer galbeedka, oo isku dayaya in ay jebiyaan go’doominta ay ku hayaan Dekedaha Israel.
Abdul-Malik Al Houthi ayaa sheegay in Israel ay 321 maalmood oo xiriir ah ay Marinka Gaza ka wadday sida uu yiri dembiyada qarniga oo ka dhan ah dadka Gaza, iyadoo kaashaneysa Mareykanka iyo qaar ka mid ah dalalka reer Yurub.
“Cadowga Sahyuuniyadda ayaa waxay weli wadaan olole xasuuq, oo ay ku xasuuqayaan shacabka Falastiiniyiinta ee ku sugan Marinka Gaza. Waxay wadaan duqaymo, gaajeysiin, jirdil iyo dembiyo kale.” Ayuu yiri Abdul-Malik Al Houthi.
Waxa uu dhalleeceeyay, sida dowladaha qaar ee Carabta ay uga gaabiyeen wax ka qabashada dhibaatada lagu hayo shacabka Falastiiniyiinta, isagoona ku eedeeyay in ay xitaa xarig, caburin iyo ganaax lacageed isugu darayaan dadka ka damqanaya weerarada cadowtinimada ah ee Israel.
Hoggaamiyaha Xuuthiyiinta Yemen, Abdul-Malik Al Houthi ayaa ammaanay go’aankii Dowladda Colombia ay Isniintii ku mamnuucday in dhuxusha laga qado dalkaasi loo dhoofiyo Israel.
Madaxweynaha Colombia, Gustavo Petro ayaa sheegay in Israel ay dhuxusha Colombia u adeegsato, si ay bambaanooyinka ugu disho buu yiri carruurta Falastiiniyiinta.
Hoggaamiyaha Xuuthiyiinta oo arrintaasi ka hadlayay ayaa yiri “Iyadoo Maamulada Carabta qaar ka mid ah ay sii wadaan inay la ganacsadaan Tel Aviv ayay Dowladda Colombia mamnuucday in dhuxusha loo dhoofiyo Israel, si looga hortago in dembiyo lagu gaysto.”
Hoggaamiyaha ayaa intaasi ku daray “Difaaca Gaza iyo Dhismaha Masjidka Al Aqsa waa waajibka koowaad ee dhammaan Muslimiinta. Daacad la’aanta iyo ku guuldareysiga in la caawiyo Falastiin waxay khatar ku tahay dunida Muslimka oo dhan.”
Hoggaamiyaha Xuuthiyiinta ayaa ugu dambayn shacabka Yemen ugu baaqay in maalinta Jimcaha ay isugu soo baxaan waddooyinka, si garab istaag dhab ah loogu muujiyo dadka reer Gaza.