Dagaalka Ciidamada Israel ay kula jiraan Xoogaga Ururka Xisbullah ee dalka Lubnaan ayaa u muuqdo mid daba dheeraan doona, ka dib markii ay guuldareysteen dadaaladii xabad joojinta ee Mareykanka uu gadaal ka riixayay.
Raysal Wasaaraha Lubnaan, Najib Mikati ayaa Israel ku eedeeyay in ay caqabad ku noqotay xabad joojintii labada dal ee la soo jeediyay, ka dib markii ay kordhisay weeraradeeda xagga cirka ee ka dhanka ah dalkaasi.
Wakaaladda Wararka Lubnaan ee NNA ayaa ku warameysa in Ciidanka Cirka Israel ay sii wadaan bartilmaameedyada ay ka fulinayaan dalkaasi.
Raysal Wasaaraha Israel, Benjamin Netanyahu oo Axaddii booqday deegaanada xuduudda ayaa sheegay in Israel ay sii wadi doonto dagaalka ay ku wiiqayaan Ururka Xisbullah.
Raysal Wasaaraha ayaa wacad ku maray inaysan xabadda ka joojin doonin Xisbullah, illaa iyo inta ay dib ugu riixayaan meelaha ka baxsan Webiga Litani, kaas oo qiyaastii 30km u jira xuduudda Israel.
“Heshiis ama heshiis la’aan, dadkeennii ka barakacay waqooyiga Israel waxaan si nabad ah ugu soo celin doonnaa guryahooda. Si taas loo helo, Xisbullah waxaan ka daba marin doonnaa Webiga Litani, si aysan dhibaato amni ugu noqon Israeliyiinta reer waqooyiga ah.” Ayuu yiri Netanyahu.
Wixii ka dambeeyay 1-dii bishii October oo Israel ay bilowday duulaankeeda dhinaca dhulka ee ka dhanka ah Xisbullah ayaa waxaa aad u korodhay tirada Isreliyiinta ka carareysa colaadda xuduudda.
Xisbullah ayaa horey ugu hanjabtay in Israeliyiintii horey ugu barakacay gantaalaha isaga gudba xuduudda labada dal aysan dib ugu soo laaban doonin guryahooda, inta uu socdo dagaalka Gaza, dagaalka dhinaca dhulka ahna uu keeni doono in Israeliyiin kaloo hor leh ay ka cararaan guryahooda waqooyiga Israel.
Waxaa su’aal la iska weydiinaya, sida shacabka Israel ay guryahooda ugu soo laaban karaan, xilli uu xoogeysanayo dagaalka Israel iyo Xisbullah.
Wasiirka Arrimaha Dibadda Mareykanka, Antony Blinken ayaa dhowr jeer ku celceliyay in xalka ugu wanaagsan ee ay shacabka labada dhinac ku soo noqon karaan uu yahay, iyadoo la isla qaato heshiis xabad joojineed.
Taliska Militariga Israel ayaa maanta oo ugu dambeysay sheegay in Xisbullah ay gantaalo fara-badan ku soo weerartay waqooyiga Israel, xilli uu soconayo dagaalka dhulka ee xuduudda.
Dagaalka oo galay bishii labaad ayaa waxaad arkaysaa in saamayn weyn uu ku yeelanayo shacabka labada dal, waana kuwa qiimaha ugu badan ku bixinaya dagaalkan.
Wasaaradda Caafimaadka Lubnaan ayaa xaqiijisay in tirada dadka rayidka ah ee ku dhintay duqaymaha Israel ay gaartay ku dhawaad saddex kun oo qof iyo dhaawaca in ka badan 13,400 oo qof.
Ma cadda khasaaraha dhabta ah ee shacabka Israel ka soo gaaray dagaalkan, sababtu tahay Israel oo la aaminsan yahay inay qarineyso xogta rayidka.
Warbaahinta ayaa fahamsan in mar kasta uu khasaaraha Israeliyiinta ka yar tahay midka rayidka reer Lubnaan, maadaama ay Israeliyiintu ku xaroodaan godadka amniga dhulka hoostiisa ee gantaalada laga galo, marka ay maqlaan dhawaqa seeriga digniinaha.
Hase yeeshee, si kasta oo khasaaraha Israeliyiinta uu uga yar yahay midka Lubnaaniyiinta, waxaa haddana dhibaato ugu filan baqdinta ay la nool yihiin iyo in gantaaladu ay carqaladeynayaan shaqooyinkoodii iyo dhaqdhaqaaqyadoodii guud ee gudaha Israel.
Furinta labaad ee dagaalka Israel ka furtay Bariga Dhexe, waa dagaalka Lubnaan’e ayaa uga sii daray xaaladdii amni iyo midda dhaqaale ee Israel.
Shacabka Israel ayaa xukuumadda uu Netanyahu hoggaamiyo ku eedeynaya in ay dhexda ka gelisay xaaladdii ugu adkeyd ee ay ebid wajayaan.
Wararka, wareysiyada iyo doodaha ka baxaya Warbaahinta maxaliga ayaa si aan la arag loogu dhalleceynaya Netanyahu iyo xertiisa, iyadoona Netanyahu iyo Wasiiradiisa mayalka adag lagu eedeynayo in danta qaranka ay ka hormarinayaan tooda gaarka ah.
Siyaasiyiinta Mucaaradka Israel ayaa xukuumaddan ku tilmaamay middii ugu xagjirsaneyd ee dalka ka arrimisa, taariikhda Israel.