In ka badan 100 qof oo dad shacab ah ayaa Sabtidan lagu dilay Marinka Gaza, ka dib markii diyaaradaha dagaalka Israel ay garaaceen dhisme iskuul oo dadka barakacayaasha ay gabaadsanayeen.
Duqayntan ayaa loo gaystay Dugsiga Al-Tabin (Al-Taba’een) oo ku yaala Magaalada Gaza, oo ah tan ugu weyn ee Marinka Gaza, iyadoo muddooyinkan uu hoy u ahaa qoysaska barakacayaasha. Dugsiga ayaa waxaa dhawaan ku soo barakacay kun qof oo deganaa deegaanka Beit Hanoun, ka dib markii Taliska Militariga Israel uu dadka rayidka ah ku amray inay halkaasi banneeyaan.
Goobjoogeyaasha ayaa sheegay in saakay ay dhacdo xanuun badan ka dhacday dugsigaasi, iyaga oo sheegay in ay arkayn meydad badan oo si xun u go’go’ay.
Goobjoogeyaasha waxay kaloo sheegeen in weerarku uu dhacay, xilli dadku ay Salaadda Subax ku tukanayeen masjidka uu dugsigu leeyahay.
Afhayeenka Hay’adda Bisha Cas ee Falastiin, Nebal Farsakh ayaa sheegtay in shaqaalaha caafimaadka ee Gaza ay ka argagaxeen muuqaalada dugsigaasi.
Nebal Farsakh ayaa sheegtay in dhakhaatiirta ay dadaal badani ku bixinayaan, sidii ay xaaladdooda ula tacaali lahaayeen tobanaan qof oo si xun ugu dhaawacmay weerarka.
Agaasimaha Isbitaalka Al-Ahli, Fadl Naeem ayaa sheegay in dadka qaarkood ay adag tahay in la aqoonsado, dhaawacyada halista badan ee soo gaaray awgood.
Isbitaalkan ayaa waxaa la geeyay in badan oo ka mid ah dadkii faraha badnaa ee ku dhaawacmay weerarka xagga cirka ah ee ka dhacay dugsigan.
Xafiiska Warfaafinta Gaza ayaa sheegay in tirada dadka ku dhintay weerarka ay kor u dhaafayaan 100 qof, tobanaan kalena ay ku dhaawacmeen.
Taliska Militariga Israel ayaa sheegay in dugsigu uu ahaa meel ay kooxaha wax iska caabinta ee Xamaas iyo Islamic Jihaad u adeegsan jireen saldhig militari, eedeymahaasi oo Xamaas ay beenisay.
Israel ayaa qaadday weerarkan, xilli dalalka dhexdhexaadiyeyaasha ee Masar iyo Qatar oo Mareykanka uu kaabayo ay ku baaqeen in dib loo bilaabo wada hadalada xabad joojinta Gaza.
Jimcihii, tobanaan qof oo u badan dumar iyo carruur ayaa lagu dilay Marinka Gaza, ka gadaal markii diyaaradaha Israel ay beegsadeen goobihii ay deganaayeen.
Ciidamada Israel ayaa u muuqdo kuwo kordhiyay weerarada ay ka gaysanayaan goobaha ay dadka rayidka ah ku badan yihiin, xilli ay jirto rajo ah in la soo afjaro colaaddan.
Israel waxay kordhisay weeraradeeda Gaza, iyadoo ay xaalad aad u kacsan ka jirto Bariga Dhexe, oo ka dhalatay dilkii Hoggaamiyihii Ururka Xamaas, Ismail Haniyeh loogu gaystay dalka Iran.
Iran iyo xulafadeeda gobolka ayaa wacad ku maray inay si adag uga aargudan doonaan Israel.
