Dowlado ay ku jiraan kuwa Bariga Dhexe iyo hay’ado caalami ah ayaa si kulul u cambaareyay weerarka ay Israel saqdii dhexe ee xalay ku qaadday xerada dadka barakacayaasha degan yihiin ee ku taala deegaanka Al-Mawasi ee koonfurta Marinka Gaza.
Diyaaradaha dagaalka Israel ayaa garaacay teendhooyinka qoysaska barakacayaasha degan yihiin ee Al-Mawasi, waana xilli Israel ay horey goobtaasi ugu aqoonsatay aag bani’aadantinimo.
Ciidanka Cirka Israel ayaa dhowr jeer bartilmaameedsaday teendhooyinka ka dhisan goobta bani’aadantinimo. Inta la xaqiijiyay weerarka ayaa waxaa ku dhintay 40 qof, halka 60 kalena ay ku dhaawacmeen.
Mohammed al-Mughair oo ka tirsan Hay’adda Difaaca Madaniga ee Marinka Gaza ayaa sheegay in kooxaha samatabixinta ay weli baadigoobayaan 15 qof oo la la’yahay, ka dib weerarka lagu qaaday teendhooyinka barakacayaasha.
Dowladaha Bariga Dhexe, sida Turkiga, Iran, Sacuudiga iyo Masar ayaa weerarka dhimashada badan dhaliyay ku tilmaamay dembi dagaal.
“Waxaan cambaareynaynaa xasuuqa Israel u gaysatay tobanaan Falastiiniyiin ah oo deganaa teendhooyinka dadka rayidka ah ee loogu yeero aagga bini’aadantinimada.” Ayaa lagu yiri bayaan ka soo baxay Wasaaradda Arrimaha Dibadda Turkiga. Bayaanka ayaa lagu sheegay in Israel ay gaysatay dembi cusub, kaas oo loogu darayo liiska dembiyadii ay horey uga gaysatay Gaza.
Wasaaradda Arrimaha Dibadda Falastiin ayaa Beesha Caalamka ku dhaliishay inay ku guuldareysatay hirgelinta sharciga caalamiga ah, si loo joojiyo xasuuqa sii socda ee ay Israel ka waddo Marinka Gaza.
Wasaaradda Arrimaha Dibadda Sacuudiga ayaa sheegtay in Riyadh ay gebi ahaanba ka soo horjeeddo xasuuqa joogtada ah ee Israel, waxayna ku baaqday in si degdeg ah loo joojiyo colaadda Gaza.
Wasaaradda Arrimaha Dibadda Masar ayaa sheegtay in tallaabo wax ku ool la’aanta caalamka ay wiiqday kalsoonida shuruucda caalamiga ah ee bani’aadantinimada iyo qiyamka aadanaha
Qaahira waxay ku baaqday in la xoojiyo dadaalada lagu soo celinayo rajada shacabka Falastiiniyiinta ee aayo ka tashigooda iyo dib-u-soo celinta xorriyaddooda.
India oo lagu tilmaamo xulafada dhow ee Israel ayaa ku baaqday “Xabad joojinta Gaza waa in loo gaaraa, sida ugu dhakhsaha badan.”
Hay’adaha arrimaha bani’aadantinimada ka shaqeeya, sida ActionAid ayaa Israel ku eedeysay in xitaa ay khatar dhab ah ku hayso shaqaalaha bani’aadantinimada ee ka hawlgala Marinka Gaza.
Hay’adda ActionAid ayaa Talaadadan sheegtay in shaqaaluhu ay caqabado waaweyn kala kulmayaan Ciidamada Israel, heerka khatarta badbaadadana ay labadii toddobaad ee la soo dhaafay gaartay meeshii ugu sarreysay, iyadoo warbixinadu ay sheegayaan in Ciidanka Cirka Israel ay weeraro ku hayaan bakhaarada raashiinka iyo kolonyada u raran hay’adaha caalamiga ah ee kaalmada bani’aadantinimo gaynaya dhulka go’doonsan.
Dowladda Australia ayaa sheegtay in Ingiriiska iyo xulafada kale ay la kaashaneyso, sidii Israel loogu cadaadin lahaa joojinta dhibaatada shacabka Falastiiniyiinta iyo in xal loo helo nabaad guurka sharciga caalamiga ah ee ilaalinaya shaqaalaha gargaarka.
Australia ayaa soo dhaweysay go’aankii uu Ingiriiska toddobaad ka hor ku joojiyay 30 ruqsad ama shati oo agabka militari looga iibinayay Israel.
“Australia waxay la shaqeynaysaa la hawlgalayaasha oo uu ku jiro Ingiriiska, si cadaadis loo saaro Israel, loona arko is bedel dhab ah oo ku saabsan xaaladda Gaza.” Ayay tiri Penny Wong, oo ah Wasiirka Arrimaha Dibadda Australia.
Warka Australia ayaa lagu macneeyay calaamad kale oo muujineysa, sida reer galbeedka uu uga dhammaanayo dulqaadkii ay u hayeen Israel.
Dembiyada ka dhacaya Gaza ee leh dilka, burburinta, gaajeysiinta shacabka aan waxba galabsan iyo joogteenta Israel ee masiibooyinka bani’aadantinimo ee maalin walba laga daawanayo telefishinada iyo barraha bulshada waxay bulshada caalamka dareensiineysaa xanuun, caawinaad la’aan, sharaf dhac iyo jebin qaawan oo ka dhan ah sharciga caalamiga ah ee bani’aadantinimada iyo xeerarka kale ee caalamiga ah.
Dhanka kale Wasiirka Arrimaha Dibadda Mareykanka, Antony Blinken ayaa maanta sheegay in 90% laga heshiiyay arrimaha xabad joojinta Gaza, balse waxa uu walaac ka muujiyay in inta harsan ay yihiin kuwo adag.
Blinken ayaa sheegay in Mareykanka uu kala sii shaqayn doono Masar iyo Qatar, sidii loo dhameen lahaa buu yiri daldaloolooyinka jira.
Blinken ayaa warkan ka sheegay shir jaraa’id oo isaga iyo dhiggiisa Ingiriiska David Lammy ay ku qabteen Magaalada London.
Mr. Lammy ayaa sheegay in Mareykanka iyo Ingiriiska ay ka mideysan yihiin baahida loo qabo in la xaqiijiyo xabad joojinta Gaza iyo in xiisadda gobolka loo maro waddo nabadeed.
Lammy ayaa sheegay in xalka laba dal oo deris ah uu horseedi karo in la soo afjaro colaadda tobanaanka sano ka jirtay Bariga Dhexe.
Wasaaradda Caafimaadka Gaza ayaa maanta sheegtay in tan iyo markii uu dagaalku bilowday, tirada dadka rayidka ah ee la dilay ay gaartay 41,020 qof, 94,925 kalena ay dhaawacmeen.
