Diyaaradaha dagaalka Israel ayaa caawa fiidkii garaacay goobo ku yaala Magaalada Hudaydah ee dalkaasi Yemen, ka dib weerarkii diyaaradda drone-ka loo adeegsaday ee ay Jimcihii Xoogaga Xuuthiyiinta ka gaysteen bartamaha Magaalada Tel Aviv. Weerarkaas ayaa waxaa ku dhintay hal qof, toban kalena way ku dhaawacantay.
Wararka ayaa sheegaya in diyaaradaha dagaalka Israel ay garaaceen haamaha shidaalka ee ku yaala magaalada dekedda leh.
Warbaahinta gobolka ayaa bilowgii ku warantay in diyaaradaha Israel ay duqayn is xigxigtay ku qaadeen goobo shidaalka lagu kaydiyo oo ku yaala magaalada dhacda galbeedka Yemen.
Wasaaradda Caafimaadka Yemen ayaa sheegtay in weerarada lagu qaaday Dekedda Hudaydah ay gaysteen khasaare dhimasho iyo dhaawacba leh.
Telefishinka afka Xuuthiyiinta ku hadla ee Al Masirah ayaa goor dhow baahiyay in duqaymaha ay ka dhasheen khasaare kala duwan oo naf iyo maalba leh.
“Weerarka waxaa si gaar ah loogu bartilmaameedsaday xarunta korontada iyo haamaha shidaalka, taas oo keentay in korontada ay ka go’do guud ahaanba Hudaydah.” Ayuu ku waramay telefishinku.
Muuqaalada ayaa muujinaya goobaha la duqeeyay oo gubanaya iyo uuro xoog leh oo cirka isku shareertay.
Militariga Israel ayaa xaqiijiyay in diyaaradahooda dagaalka ay weerareen magaalada afaraad ee ugu weyn dalka Yemen.
Taliska Ciidamada Mareykanka ee gobolka ayaa iska fogeeyay ku lug lahaanshaha weerarkaasi, isla-markaana ay Israel keligeed sameysay.
Warbaahinta Israel ayaa ku warameysa in illaa 12 diyaaradood oo kuwa dagaalka ah, oo ay ku jiraan diyaaradaha F-35 ay ka qayb qaateen weerarka Dekedda Hudaydah.
Warbaahinta Israel waxay sheegtay in duqaymaha Hudaydah ay jawaab u yihiin boqolaal weerar, oo billihii la soo dhaafay Israel uga imanayay dhanka Xuuthiyiinta.
TV-ga Channel 14 ee Israel ayaa sheegay in mar hore la qorsheeyay duqaymaha xagga cirka Israel ee Yemen, balse la fuliyay, ka dib weerarkii subaxnimadii Jimcaha lagu qaaday Tel Aviv.
Wasiirka Difaaca Israel, Yoav Gallant oo Warbaahinta maxaliga ay soo xiganeyso ayaa sheegay in duqaymahan ay kaga jawaabayeen weerarka dhimashada iyo dhaawaca sababay ee ka dhacay Tel Aviv.
Dhanka kale Xuuthiyiinta Yemen ayaa la filayaa in ay jawaab degdeg ah ka bixiyaan duqaymahan, inkastoo aan la ogeyn goobaha ay weerari doonaan.
Afhayeenka Xafiiska Siyaasadda ee Xuuthiyiinta, Mohammed Abdul-Salam ayaa sheegay in duqaymahan looga gol leeyahay in lagu cabsiiyo shacabka Yemen, si ay u joojiyaan weerarada ay ku garab taagan yihiin shacabka Falastiiniyiinta.
Afhayeenka ayaa wacad ku maray in weeraradan lagu soo qaaday dalkooda ay ka qaadi doonaan dhiiranaan iyo inay xoojiyaan hawlgalada militari ee ay taageerayaan ugu muujinayaan dadka reer Gaza.
Xuuthiyiinta oo ka arrimiya inta badan dalka Yemen ayaa marar badan sheegay in aysan joojin doonin weeraradooda ka dhanka ah Israel iyo danaheeda gobolka, illaa iyo inta xasuuqa iyo go’doominta daran lagu hayo shacabka Falastiiniyiinta ee ku nool Marinka Gaza.
Duqaymahan ugu dambeeyay ee Israel ka gaysatay dalka Yemen ayaa calaamad u ah, sida colaadda Gaza ay ugu fideyso gobolka.
