Wasaaradda Caafimaadka Lubnaan ayaa sheegtay in weerarada xagga cirka ee Israel maanta ka gaysatay dalkaasi ay ku dhinteen 182 qof, 727 kalena ay ku dhaawacmeen.
Wararka ayaa sheegaya in Taliska Miitariga Israel uu ballaariyay hawlgalad xagga cirka ee ka dhanka ah Ururka Xisbullah, inkastoo diyaaradahooda ay beegsadeen dhismayaal ay degan yihiin dad rayid ah.
Israel ayaa sheegtay in ay garaacday 300 oo goobood oo Xisbullah ay ku leedahay koonfurta iyo bariga Lubnaan, iyadoona ku hanjabtay inay sii wadi doonto bartilmaameedyada ka dhanka ah xarumaha militari ee Xisbullah.
Wakaaladda Wararka Lubnaan ee NNA ayaa ku warantay in diyaaradaha dagaalka Israel ay duqaymo ka gaysteen Magaalooyinka Tefahta, Babliyeh & Sarafand iyo deegaano ay ka mid yihiin Kfar Hatta, Babliyeh, Kawthariyeh Al-Sayyad iyo Al-Ghassaniyah.
Wakaaladda Wararka NNA waxay sheegtay in diyaaradaha dagaalka Israel ay duqeeyeen laba dhisme oo dad rayid ah ay degan yihiin, isla-markaana ay waxyeelo kala duwan ka soo gaartay.
Wasaaradda Caafimaadka Lubnaan waxay sheegtay in khasaaraha dadka rayidka ah uu ka badan karo, tirada ugu dambeysay ee la diiwaangeliyay.
Dhanka kale Xoogaga Ururka Xisbullah ayaa si xoog leh u garaacaya goobaha ay Ciidamada Israel kaga sugan yihiin deegaanada waqooyiga Israel.
Xisbullah ayaa war ay soo saartay ku sheegtay in xoogageeda ay si sax ah gantaalo ugu burburiyeen laba xero ciidan, sidoo kalena ay gantaaladeedu gaareen Dhismaha Warshadda Difaaca Rafael ee ku taala Magaalada Haifa.
Xisbullah waxay ku goodisay in ay duqaymaha ku fidin doonto gudaha Israel, si la mid ah, sida Tel Aviv ay sida qotada dheer ugu garaaceyso gudaha dalkaasi.
Taliska Militariga iyo Maamulka Israel ayaan wax war ah ka soo saarin khasaaraha ka dhashay duqaymaha ay Xisbullah ku hayso deegaanada waqooyiga.
Labada dhinac waxay u muuqdaan kuwo ka gudbay heerkii is xakameynta, si looga hortago isku dhac ballaaran oo gobolka oo dhan ah.
Is tuurtuurka gantaalaha ee labada dhinac ayaa 11-kii bilood ee la soo dhaafay ahaa kuwo goos goos ah, haddase waxaad arki kartaa in ay xargaha goosteen.
Raysal Wasaaraha Lubnaan, Najib Mikati ayaa ugu baaqay Qaramada Midoobey iyo dalalka saamaynta ku leh Israel in ay wax ka qabtaan gardarrada Israel ee ka dhanka ah dalkiisa.
Siyaasiyiinta reer Lubnaan ayaa Israel ku eedeeyay inaysan ixtiraameynin dadka rayidka ah, isla-markaana ay u bartilmaameedsaneyso, si aan kala sooc lahayn.
Dhanka kale Militariga Israel ayaa shacabka reer Lubnaan ee ku nool koonfurta dalkaasi ku wargeliyay in ay ka fogaadaan kaabeyaasha militari ee Xoogaga Xisbullah iyo meelaha kale ay gantaalada ka soo tuurayaan.
Wararka ayaa sheegay in Israel ay farriintan shacabka ku nool koonfurta dalkaasi iyo weliba Caasimadda Beirut kula wadaagtay teleefanadooda gacanta.
Madaxa Shirkadda Isgaarsiinta Ogero ee Lubnaan, Imad Kreidieh ayaa sheegay in ay heleen in ka badan 80,000 oo looga shakisan yahay isku dayo teleefoon oo Israel ah, oo shacabka lagu weydiistay in ay ka baxaan meelaha ay degan yihiin.
Wakaaladda Wararka Reuters ayaa Imad Kreidieh ka soo xigatay in wicitaanada noocan oo kale ah ay yihiin dagaal maskaxeed, si loo sameeyo buu yiri qas iyo qalalaase.
Afhayeenka Ciidamada Israel, Daniel Hagari ayaa sheegay in saakay ay shacabka gaarsiiyeen farriintooda ah in ay ka fogaadaan goobaha loo garan ogyahay Xisbullah.
Afhayeenka oo Warbaahinta la hadlay ayaa sheegay in Ciidamada Israel ay weerar ballaaran ku qaadayaan dalka Lubnaan.
Afhayeenka ayaan meesha ka saarin suurtagalnimada in Ciidamada Israel ay guluf dhinaca dhulka ah ku galaan dalkaasi, si dadka reer Israel ee ku barakacay xiisadda xuduudda dib loogu soo celiyo guryahooda.
Si kastaba ha-ahaatee shacabka labada dal ayaa ka baqdin qaba in ay dhibane u noqdaan dagaalka wejiga cusub yeeshay.
