Dowladda Jarmalka ayaa Iran ka codsatay in ay gacan ka gaysato, sidii loo baajin lahaa dagaal buuxa oo dhex mara Ururka Xisbullah iyo Israel.
Wasiirka Arrimaha Dibadda Jarmalka, Annalena Baerbock ayaa Iran ku boorisay inay hoos u dhigto colaadda qarka u saaran inay ku baahdo Bariga Dhexe.
Annalena Baerbock oo khadka teleefanka kula hadashay Kusimaha Wasiirka Arrimaha Dibadda Iran, Ali Bagheri Kani ayaa u sheegtay in loo baahan yahay in laga hortaggo in colaadda ay ku fiddo gobolka oo dhan.
“Waa in laga hortaggo xiisad dheeraad oo dhan walba ah.” Ayay tiri Annalena Baerbock oo wada hadalkaasi ka dib war qoraal ah soo saartay.
“Iran waa in ay gacan ka gaysataa in colaadda aysan ku fidin gobolka oo dhan.” Ayay sii raacisay Annalena Baerbock.
Iran waa dowladda qura ee la ogyahay ee kaalmada tooska ah siiso Ururka Xisbullah ee ka arrimiya koonfurta Lubnaan.
Iran ayaa la sheegaa in ay Xisbullah siiso taageero maaliyadeed, mid militari iyo weliba tababaro uu heerkoodu sarreyo, waana cidda keliya ee la fahamsan yahay ee Xisbullah wax ka dhageysato.
Xisbullah iyo Xuuthiyiinta Yemen ayaa ah labada urur ee ugu weyn ee ka jira gobolka, isla-markaana ka soo horjeeda weerarada naxariis darrada ah ee ay Israel ka gaysaneyso Marinka Gaza.
Xoogaga Xisbullah ayaa caqabad ku noqday amniga Israel, halka Xuuthiyiintana ay wiiqayaan dhaqaalaheedii, marka aad eegto in ay diidan yihiin in maraakiibta ganacsiga caalamiga ah ay taggaan dekedaheeda.
Xuuthiyiinta iyo Xisbullah ayaa ka mid ah dhidibka wax iska caabinta ee ay Iran baritaarto ee ka jira Bariga Dhexe.
Dhidibka wax iska caabinta ayaa la isku yiraahdaa ururada hubeysan ee ka hawlgala dalalka Yemen, Lubnaan, Ciraaq iyo Suuriya.
Ururadan ayaa ku hanjabay inaysan joojin doonin weerarada ka dhanka ah Israel iyo maraakiibta ku sii jeeda dekedaheeda, inta uu socdo dagaalka Marinka Gaza.