Gelinkii dambe ee Jimcihii ayaa waxaa soo baxay warar sheegaya in Israel ay beegsatay kolonyo sahay gargaar u siday Isbitaalka Emirate-ka Carabta ee Marinka Gaza.
Hay’adda American Near East Refugee Aid (Anera) oo ka hawlgasha Marinka Gaza ayaa sheegtay in afar qof ay ku dhinteen weerar gantaal oo lagu qaaday kolonyada gargaarka.
Hay’addan ayaa Israel ku eedeysay in diyaaradaheeda dagaalka ay beegsadeen kolonyada gargaarka, ayna dileen shaqaale u shaqeynayay shirkad gaadiid ah, oo hay’adda gargaarka ay u adeegsaneysay inay sahay keento Isbitaalka Emirate-ka ee Rafah.
Agaasimaha Hay’adda Anera ee Falastiin, Sandra Rasheed ayaa xaqiijisay in weerarku uu dhacay Khamiistii, ayna ku dhinteen afar qof.
“Duqaynta ayaa ka dhacday Waddada Salah Al-Din ee Marinka Gaza, waxaana lala eegtay gaarigii ugu horreyay ee kolonyada.” Ayay tiri Sandra Rasheed.
Sandra Rasheed ayaa sheegtay in weerarku uu dhacay, xilli ay Israel fasax uga haysteen in gargaarka la geeyo isbitaalkaasi.
Haweeneydan ayaa Wakaaladda Wararka AP u sheegtay in shaqaalahooda ay la socdeen kolonyadaasi, balse aan la bartilmaameedsan gaarigii ay saarnaayeen.
Sandra Rasheed ayaa warsaxaafadeed ay mar dambe soo saartay ku sheegtay in afarta qof ee weerarka lagu dilay ay ahaayeen muwaadiniin Falastiiniyiin ah.
Taliska Militariga Israel ayaa dhankooda ku andacooday in weerarku uu ahaa mid lagaga hortagayay kooxaha iska caabinta, oo isku dayay in ay kolonyadaasi leexsadaan.
Taliska ayaa qoraal ku sheegay in weerarku uu meesha ka saaray khatarta ah in lala wareego kolonyadaasi, kan la duqeeyay maahee intii kalena ay si caadi ah u sii wateen socodkooda, isla-markaana ay si nabad ah ku gaareen isbitaalkii ay u socdeen.
Sandra Rasheed, Agaasimaha Hay’adda Anera ee Falastiin ayaase sheegtay inay baari doonaan, sida ay wax u dhaceen.
Maaha markii ugu horreysay kolonyo ay fasaxeen Ciidamada Israel oo lagu duqeeyo gudaha Marinka Gaza.
Dadka rayidka ah oo ay ku jiraan shaqaalaha gargaarka ayaa si joogta ah loogu bartilmaameedsadaa qaybaha Marinka Gaza.