Madaxweynaha Dowlad Goboleedka Jubbaland, Axmed Maxamed Islaam (Axmed Madoobe) ayaa maanta booqashadii ugu horreysay ku tegay deegaanka Buulo Xaaji ee Gobolka Jubbada Hoose, oo dhawaan laga saaray maleeshiyada Al Shabaab.
Al Shabaab ayaa dhowr iyo toban sano ka arrimineysay Buulo Xaaji oo qiyaastii 80km dhinaca koonfur galbeed uga beegan Magaalada Kismaayo, waana markii ugu horreysay oo ciidamadu ay si buuxda uga la wareegaan Shabaabka.
Madaxweynaha Jubbaland ayaa meel fagaare ah kula hadlay dadka deegaanka, waxaana uu ku booriyay in ay la shaqeeyaan maamulka iyo ciidamadaba.
Madaxweynaha ayaa tilmaamay in ciidamadu aanay dib uga laaban doonin Buulo Xaaji, isagoona hoosta ka xariiqay in maamulku uu Buulo Xaaji ka hirgelin doono dhammaan adeegyada lagama maarmaanka ah, sida caafimaadka, waxbarashada, biyaha iyo wax kastoo dowladi looga baahnaa.
Madaxweynaha ayaa intaasi ku daray in deegaanka ay ka hirgelin doonaan maxkamad, iyadoo aan la aqbali doonin in dadku ay dacwadahooda la aadaan maxkamadaha ay Shabaabka maamulaan.
Madaxweynaha ayaa sidoo kale bulshada deegaanka u sheegay in sida ugu dhakhsiyaha badan loo soo dhisi doono maamulka deegaanka.
Axmed Maxamed Islaam, Madaxweynaha Jubbaland ayaa Shabaabka ku eedeeyay in ay hurinayaan colaadaha beelaha walaalaha ah ee wada degan.
Madaxweyne Axmed Madoobe ayaa reer Buulo Xaaji kula dardaarmay in ay ka feejignaadaan dhagaraha Shabaabka, isla-markaana ay noqdaan dad walaalo ah oo mideysan.
“Ma doonayno falsadii gumeysiga inaan dib ugu noqono, oo ahayd qaybi oo xukun ee waxaan doonaynaa dadku inay noqdaan dad mida oo walaalo ah.” Ayuu yiri Axmed Madoobe.
Axmed Madoobe ayaa gaaray Buulo Xaaji, isaga oo ku labisan dareyska Ciidamada Militariga, iyadoona uu riixayo in la sii wado hawlgalada Shabaabka looga kicinayo deegaanada ay kaga harsan yihiin Gobolka Jubbada Hoose.
Kumaandooska Danab iyo Ciidanka Daraawiishta Jubbaland ayaa gobolkaasi ka wada dhaqdhaqaaqyo ciidan oo ka dhan ah Al Shabaab.
