Madaxweynaha Belarus, Alexander Lukashenko ayaa sheegay in Ukraine ay halis ugu jirto in dunida laga samaxo jiritaankeeda, ka dib weerarada ay ciidamadeeda ka bilaabeen gudaha dalka Ruushka.
Madaxweynaha ayaa ka digay kororka xiisadda ka jirta bariga Qaaradda Yurub, waxaana uu soo jeediyay in Ruushka iyo Ukraine ay ku laabtaan miiska wada hadalka.
Madaxweynuhu waxa uu labada dal ku booriyay inay xalkooda ka wada shaqeeyaan, si loo gaaro heshiiska nabadda ee loo baahan yahay, loogana baaqsado masiibo sababi karta in Ukraine laga tirtiro qaaradda.
“Moscow iyo Kyiv waa inay khilaafkooda ku dhameeyaan wada-xaajood, haddii kale colaadda waxay keeni doontaa burburka Ukraine.” Ayuu yiri Alexander Lukashenko, Madaxweynaha Belarus.
Madaxweynaha oo la hadlay Telefishinka Ruushka ee Rossiya ayaa sheegay in weerarada ay Ciidamada Ukraine ka wadaan Gobolka Kursk ee Ruushka uu Ukraine ku sii dhaweynayo halista ay ugu jirto inay lumiso jiritaankeeda.
“Waxa ka socdo Gobolka Kursk waxay noqon doontaa koror keeni kara in Ukraine la wayo.” Ayuu yiri Lukashenko oo Ukraine ugu baaqay inay joojiso weerarada ay ka waddo dhulka Ruushka.
Lukashenko ayaa ku celiyay in wada hadalada ay muhiim u yihiin in laga hortago masiibo soo fool leh, haddii la doonayo in qaaradda nabad loogu wada noolaado.
Wada hadalada nabadda ee labada dal ayaa burburay, ka gadaal waxa uu Ruushku ugu yeeray fara-gelinta reer galbeedka ee hubeynta iyo taageeradooda kale ee Ukraine.
Madaxweynaha Ruushka, Vladimir Putin ayaa dhawaan sheegay inaysan suurtagal ahayn wax xiriir ah oo lala sameeyo Ukraine, illaa iyo inta ay ciidamadeeda wadaan weerarada ka dhanka ah dadka rayidka ah iyo hanjabaadaha la xiriira xarumaha tamarta nukliyeerka.
Digniinta iyo baaqa nabadda ee uu jeediyay Madaxweyne Lukashenko ayaa noqonayso, tii ugu horreysay ee uu jeediyo hoggaamiye gobolka ah, tan iyo markii Ciidamada Ukraine ay 6-dii bishan bilaabeen hawlgaladooda Gobolka Kursk.
Belarus waa dalka keliya ee gobolka ee iskaashiga dhow la leh Ruushka, oo si weyn ay isku hayaan xulafada NATO.