Wasiirka Difaaca Mareykanka, Lloyd Austin ayaa amar ku bixiyay in gujiska gantaalaha xambaara ee USS Georgia loo diro Bariga Dhexe, xilligan oo Israel ay xiisad kala dhaxeyso Iran.
Pentagon-ka Mareykanka ayaa sheegay gujiska USS Georgia uu wehlin doono markabka diyaaradaha dushiisa ka haadaan ee USS Abraham Lincoln.
Mareykanka ayaa ka walaacsan in Iran ay jug xoog leh u gaysato Israel, ka dib dilkii Hoggaamiyihii Ururka Xamaas, Ismail Haniyeh ee 31-kii bishii July loogu gaystay Magaalada Tehran.
Iran iyo ururada hubeysan ee gobolka ka jira ayaa la sheegaya in ay wadaan qorshe ay damacsan yihiin in ay kaga aargutaan Israel, iyadoo laga jawaabayo dilkii Ismail Haniyeh iyo fara-gelintii ay ku sameysay madaxbannaanida Iran.
Inkastoo aan la aqoon nooca ay noqon doonto aargudashada Iran, haddana Tehran ayaa u diyaargaroobeysa in ay iska difaacdo, haddii uu weerar kaga yimaado Israel iyo Mareykanka, marka ay fuliso weerarkeeda aargudashada.
Israel ayay sidoo kale xiisad kala dhaxeysaa Ururka Xisbullah ee Lubnaan oo si weyn uga carreysan weerarkii ay Israel 30-kii July ku dishay Fu’ad Shukur, oo ahaa Abaanduulihii Garabka Militariga Xisbullah.
Hoggaamiyaha Ururka Xisbullah, Hassan Nasrallah ayaa ku hanjabay inay ka aargudan doonaan Israel dilka ay u gaysatay sarkaalkaasi.
Waqooyiga Israel ayaa waxaa jirta baqdin ay dadku ka qabaan suurtagalnimada in uu dagaal buuxa ka dhex qarxo Israel iyo Xisbullah.
Xuuthiyiinta Yemen iyo ururada hubeysan ee Iran bari-taarto ee ka hawlgala dalalka Ciraaq iyo Suuriya ayaa iyana la sheegaya in ay ku foogan yihiin weeraro ka dhan ah Israel.
Wasiirka Difaaca Mareykanka oo Axaddii khadka teleefanka kula hadlay dhiggiisa Israel, Yoav Gallant ayaa ku celiyay in Washington ay samayn doonto wax kasta oo lagu difaaci karo Israel.
Mareykanka ayaa ka cararaya in uu Israel ku daawado isku dhacyo waaweyn oo gobolka ah, waana asbaabta uu gar iyo gardaraba u taageerayo.
Israel waa saaxiibka ugu weyn ee Mareykanka uu ku leeyahay Bariga Dhexe, waana dalka ay Israel taageerada ugu weyn ka hesho, marka ay noqoto xulafada reer galbeedka.
Taageerada militari, maaliyadeed iyo tan siyaasadeed ee uu Mareykanku la garab taagan yahay Israel waa tan ka dhigtay inay ku amar-taagleyso Bariga Dhexe.
Warbaahinta reer galbeedka ayaa sheegeysa in Israel ay hadda garowsan tahay in dhibaato weyn ay ka mudan karto dilkii ay Ismail Haniyeh ugu gaysatay gudaha Iran, haddii ay taasi dhacdana ay noqon doonto khaladkeedii ugu weynaa ee ay sameyso, muddadii 75-ka sano ahayd ee calankeeda uu ka taagnaa gobolka iyo dunidaba.
Hanjabaadaha Iran iyo xulafadeeda gobolka ayaa keentay in Israel ay wajahdo walaaceedii ugu weynaa dhanka amniga ee ay ebid la kulanto.
Raysal Wasaaraha Israel, Benjamin Netanyahu ayaa mar sii horreysay muuqaal uu soo duubay ku sheegay in Israel ay si adag uga aargudan doonto cadowgeeda, haddii la soo weeraro dhulkooda, sida uu yiri.
Inkastoo Iran iyo Israel aysan xuduud lahayn, labada dhinaca ayaa haddana ku sii dhaweynaya dagaal toos ah, kaas oo noqonaya dagaalkoodii ugu horreyay ee taariikhda.
Iran waxay Israel u aragtaa cadowgeeda ugu weyn ee gobolka, waana Iran oo xurguf ay kala dhaxeyso saaxiibka ugu muhiimsan Israel oo Mareykanka ah.
Dilkii siyaasadeed ee saaxada looga saaray Ismail Haniyeh ayaa gobolka ku riixi kara iska horimaad ballaarnaa.