Raysal Wasaaraha Somaliya, Xamse Cabdi Barre ayaa maanta Magaalada Muqdisho kula kulmay Danjiraha cusub Mareykanka ee dalka, Richard H. Riley.
Raysal Wasaaraha iyo Danjiraha ayaa ka wada hadlay danaha labada dal iyo sidii loo xoojin lahaa xiriirka iyo iskaashiga u dhaxeeya Somaliya iyo Mareykanka, sida lagu sheegay qoraal ka soo baxay Xafiiska Raysal Wasaaraha.
“Raysal Wasaare Xamse ayaa intii uu socday kulanka waxa uu ka warbixiyay siyaasadda guud ee Xukuumadda DanQaran, gaar ahaan dhinacyada siyaasadda, amniga, dhaqaalaha & arrimaha bulshada iyo horumarada la gaaray muddadii labada sano ahayd ee la soo dhaafay.” Ayaa lagu yiri qoraalka.
Qoraalka ayaa lagu sheegay “Mudane Xamse waxa uu sheegay in xukuumaddu ay waddo Qorshaha Isbedelka Qaran (National Transformation Plan), kaas oo ku saleysan hpwlaha ahmiyadda u leh xukuumadda, sida xoojinta dowlad wanaagga, kobcinta dhaqaalaha dalka iyo horumarinta arrimaha bulshada, iyada oo door muuqda ay ku leeyihiin ganacsatada iyo maalgashatada Soomaaliyeed si ka duwan qaabkii hore.”
Dhanka kale Xamse Cabdi Barre, Raysal Wasaaraha Xukuumadda Federaalka ayaa Mareykanka u caddeeyay mowqifka Dowladda Soomaaliyeed ee ku aaddan heshiiskii is afgaradka ahaa ee dhex maray Somaliland iyo Itoobiya, kaas oo Madaxweyne Xasan Sheekh Maxamuud uu ku sheegay mid sharci darro ah.
“Waxa uu intaa raaciyay in Somaliya ay diyaar u tahay Iskaashi ganacsi, dhaqaale, amni iyo is dhexgal, balse ay ku xiran tahay, isla-markaana aanay marnaba aqbali doonin illaa Itoobiya ay ka laabanayso damaceeda guracan.” Ayaa lagu yiri qoraalka ka soo baxay Xafiiska Raysal Wasaaraha.
Sida qoraalka lagu sheegay Safiirka cusub ee Mareykanka ayaa bogaadiyay guulaha ay Dowlada Federaalka ka gaartay dhinacyada siyaasadda, amniga, dhaqaalaha iyo bulshada, isagoo ugu hambalyeeyay Dowladda Soomaaliyeed ka mid noqoshada xubnaha aan joogtada ahayn ee Golaha Ammaanka ee Qaramada Midoobey, sanadka 2025 – 2026.
“Safiirku waxa uu sheegay in Dowladda Mareykanka ay sii wadi doonto taageerada ay siiyaan dalkeenna ee ay ugu horreeyan dhinacyada amniga, arrimaha gargaarka iyo horumarinta kaabeyaasha dhaqaalaha dalka, isaga oo xusay in shirkadaha Mareykanka ay si gaar ah u daneynayaan in maalgashi ay ku sameystaan Somaliya.” Ayaa lagu yiri qoraalka.
Mareykanka ayaa isku dayaya in uu hoos u dhigo xiisadda cirka isku shareertay ee Somaliya iyo Itoobiya, taas oo si weyn looga dareemay Geeska Afrika.
Xiisaddan ayaa ka dhalatay heshiiskii is afgaradka ahaa ee 1-dii bishii January ay Magaalada Addis Ababa ku gaareen Madaxweynaha Somaliland, Muuse Biixi Cabdi iyo Raysal Wasaare Abiy Ahmed, kaas oo Itoobiya u ogolanayo in laga kireeyo marin badeed.
