Mareykanka ayaa soo saaray farriin uu muwaadiniintiisu ugu sheegayo in aysan u safrin waqooyiga Israel, xilligan oo xaalad xasaasi ah ay ka jirto Bariga Dhexe.
Inkastoo Israel ay tahay saaxiibka ugu weyn Mareykanka ee gobolka, haddana Washington ayaa si maldahan dadkeeda ugu sheegtay in ay isaga baxaan waqooyiga Israel, isla-markaana ay ka fogaadaan deegaanada Israel ee ku dhow dhow xadka Lubnaan.
Mareykanka ayaa farriinta la talinta ee dhinaca socdaalka ah kula taliyay muwaadiniintiisa safarada muhiimka ah ku jooga waqooyiga Israel in ay 4km dib uga deggaan xuduudaha Lubnaan iyo Suuriya.
Wasaaradda Arrimaha Dibadda Mareykanka oo digniintan soo saartay ayaa Shaqaalaha Mareykanka ee ku sugan Israel ugu yeertay in ay xadidaan dhaqdhaqaaqooda waqooyiga Israel.
Mareykanka ayaa tani sabab uga dhigay xiisadda sii kordheysa ee u dhaxeysa Israel iyo Xisbullah, ka dib dilkii Israel ay Talaadadii u gaysatay Fu’ad Shukur, oo ahaa taliye sare oo tirsan Ururka Xisbullah.
Israel ayaa Fu’ad Shukur ku eedeysay in uu ka dambeeyay gantaalka Sabtidii lagu weeraray Magaalada Majdal Shams ee Buuraleyda Golan ee Suuriya laga haysto, oo ay ku dhinteen 12 qof.
Dhanka kale Shirkadda Diyaaradaha ee United Airlines ayaa xalay shaacisay in ay hakisay duulimaadyadii ay ku tagi jirtay magaalada ugu weyn Israel ee Tel Aviv, sababo dhinaca ammaanka ah.
United Airlines ayaa war ay soo saartay ku sheegtay in ay tallaabadan u qaadeen badbaadada macaamiisha iyo shaqaalahooda, isla-markaana ay sii wadi doonaan la socodkooda xaaladda. Shirkadda ayaa muujisay in ay adeegeeda dib u bilaabi doonto, kolka ay xaaladdu wax iska bedelaan.
“Waxaan sii wadaynaa inaan si dhow ula socono xaaladda, waxaana samayn doonnaa go’aamo ku saabsan dib u bilaabista adeegga, annaga oo diiradda saarayna badbaadada macaamiisheenna iyo shaqaalaha.” Ayaa lagu yiri warka.
Gobolka Bariga Dhexe ayaa wajahaya xaalad hubinti la’aan ah, iyadoona ay xiisadda gobolka uga sii dartay duqaynta la tuhunsan inay Israel ku dishay Hoggaamiyihii Ururka Xamaas, Ismail Haniyeh oo booqasho ku joogay dalka Iran.