Raysal Wasaaraha Somaliya, Xamse Cabdi Barre ayaa maanta Xafiiskiisa Magaalada Muqdisho ku qaabilay wafdi uu hoggaaminayo Kuxigeenka Agaasimaha Guud ee Midowga Yurub U Qaabilsan Qaaradda Afrika, Mathieu Briens.
Labada dhinac ayaa ka wada hadlay xoojinta iskaashiga iyo cilaaqaadka u dhaxeeya Somaliya iyo Midowga Yurub, sida lagu sheegay qoraal ka soo baxay Xafiiska Raysal Wasaaraha.
“Kulanka ayaa waxaa diiradda lagu saaray taageerada Midowga Yurub ee dhinacyada muhiimka ah, oo ay ka mid yihiin dib u qaabeynta amniga Somaliya ka dib bixitaanka Hawlgalka Midowga Afrika (ATMIS) iyo sidii ay iskaashi u wada sameysan lahayeen dalalka Somaliya ka taageera dhanka tababarada iyo qalabeynta ciidanka.” Ayaa lagu yiri qoraalka.
Raysal Wasaaraha ayaa qoraalka lagu sheegay in wafdiga Midowga Yurub uu uga warbixiyay xaaladda dalka ee dhinacyada siyaasadda, dhaqaalaha iyo horumarka laga sameeyay dhanka amniga iyo la dagaalanka kooxaha argagixisada.
“Mr. Mathieu ayaa dhankiisa bogaadiyay guulaha ay dowladda iyo shacabka Soomaaliyeed ka sameeyeen dhinacyada siyaasadda iyo dhaqaalaha, isagoo xusay in Midowga Yurub ay sii wadi doonaan taageerada joogtada ah ee la xiriira hawlgalada xasillinta iyo amniga Somaliya.” Ayaa lagu yiri qoraalka Xafiiska Raysal Wasaare Barre.
Midowga Yurub ayaa Somaliya ka taageera arrimaha amniga, tababarada ciidamada iyo xoojinta hannaanka dowlad dhiska ee dalka.
