Ciidamada Israel ayaa olole ballaaran oo militari ka bilaabay bartamaha Marinka Gaza, iyadoona Tel Aviv ay u muuqato mid sii ballaarineysa hawlgalkeeda dhinaca dhulka ee koonfurta iyo bartamaha dhulka go’doonsan.
Taliska Militariga Israel ayaa ku dhawaaqay olole militari, oo sida ay sheegeen ay Xoogaga Ururka Xamaas kaga sifeynayaan xerada qaxootiga Bureij ee deegaanka Deir Al-Balah ee bartamaha Marinka Gaza.
Ciidanka Difaaca Israel oo wata taangiyadooda dagaalka ayaa ku laabtay xeradaasi iyo qaybaha kale ee bariga Deir Al-Balah, waxaana xusid mudan in diyaaradahooda dagaalkana ay duqaymo ba’an ka gaysanayaan. Ciidamada Israel ayaa horey looga saaray xeradaasi, ka dib burbur baahsan oo ay ka gaysteen.
“Ciidamada oo dhanka cirka ay ka taageerayaan diyaaradaha dagaalka ayaa dib ugu laabtay xerada Bureij, waxayna bartilmaameedsanayaan saldhigyada Xamaas ee ku yaala halkaasi iyo weliba kaabeyaashooda dhulka hoostiisa.” Ayaa lagu yiri bayaan ka soo baxay Taliska Militariga Israel.
Goobjoogeyaal ayaa sheegay in Ciidanka Cirka Israel ay garaacayaan xaafadaha deegaanka Deir Al-Balah oo dhan, isla-markaana ay dadku bilaabeen in ay ka barakacaan.
Shaqaalaha hay’adaha caalamiga ah ayaa laga soo xigtay in Israel ay weerartay xeradaasi, xilli ay buuxdhaafiyeen qaar ka mid ah qoysaskii dhawaan laga soo barakaciyay deegaanka Rafah ee cirifka koonfureed ee Marinka Gaza.
Shaqaalaha caafimaadka ee ka hawlgala Marinka Gaza ayaa sheegay in Ciidamada Israel ay dileen ugu yaraan 44 qof oo dad shacab ah, boqolaal kalena ay dhaawaceen.
Hay’adda MSF ayaa iyana ku warantay in meydad iyo dhaawacyo fara-badan oo dad rayid ah la keynayo goobaha caafimaadka ee ku yaala Deir Al-Balah. MSF waxay kaloo sheegtay in dhibaneyaasha ay u badan yihiin haween iyo carruur.
Bureij waa mid ka mid ah sideedda xero qaxooti ee ku yaala Marinka Gaza, waana mid ka mid ah xeryaha ugu yar ee ka dhisan Gaza.
Xeradan ayaa dagaalka ka hor hoy u ahayd 46,000 oo qof, sida ku cad tirada u diiwaangashan Hay’adda Qaramada Midoobey U Qaabilsan Gargaarka & Arrimaha Qaxootiga Falastiiniyiinta ee UNRWA.
Bureij ayaa sidoo kale ku taala meel ku dhow xeryaha qaxootiga ee Nuseirat iyo Maghazi, oo weerarka cusub ee militari ee halkaasi ka socdo uu si weyn u sameeyay.
Israel ayaa lagu eedeynaya in ay mar kale barakacineyso boqolaal kun oo ka mid ah dadkii ay bishii hore ee May ka soo barakacisay deegaanka Rafah, kuwaa oo haatan gabaadsanayay qaybaha dhexe ee Marinka Gaza. Rafah ayaa martigelineysay 1.5 milyan oo barakacayaal Falastiiniyiin ah.
Taliska Militariga Israel ayaa Arbacadan sheegay in hawlgalka ka bilowday xerada Bureij iyo xaafadaha bariga Deir Al-Balah ay uga gol leeyihiin burburinta Xamaas.
Ciidamada Israel ee weeraray deegaanka Deir Al-Balah ayaa ka soo ruqaansaday fariisimaha ay ku leeyihiin aagga kala qaybiya waqooyiga iyo koonfurta Marinka Gaza, halkaas oo sideeddii bilood ee la soo dhaafay ay ku lahaayeen saldhig weyn, waana ciidamada diidan in dadku ay isugu kala gooshaan koonfurta iyo waqooyiga Marinka Gaza.
Gulufka militari ee dib uga soo cusboonaaday Deir Al-Balah ayaa ku soo aadaya, iyada oo dalalka dhexdhexaadiyeyaasha ee Qatar iyo Masar oo Mareykanka uu gadaal ka riixayo ay isku diyaarinayaan in Magaalada Doha laga bilaabo dadaalada caalamiga ah ee wada hadalada xabad joojinta dagaalka Gaza iyo heshiiska maxaabiis is dhaafsiga ee Israel iyo Xamaas.