Maanta iyo berri ayaa ka harsan muddadii uu Mareykanka u qabtay Israel, si ay wax uga qabato xaaladda bani’aadantinimo ee Marinka Gaza, haddii kalena ay Washington hoos u dhigi doonto taageeradeeda militari ee Tel Aviv.
Aqalka Cad ee Mareykanka ayaa Xukuumadda Raysal Wasaare Benjamin Netanyahu ka dalbaday in ay muddo 30 maalmood ah sare ugu qaaddo helitaanka gargaarka bani’aadantinimo ee Gaza.
Warqad ay ku saxiixnaayeen Wasiirada Arrimaha Dibadda, Antony Blinken iyo Gaashaandhigga Lloyd Austin ayaa 13-kii bishii hore ee October Israel loogu sheegay in Mareykanka uu dhimi doono qayb ka mid ah kaalmadii militari ee uu siinayay, haddii aysan ogolaan in gargaar mug leh la gaarsiiyo shacabka aadka ugu baahan.
Farriinta digniinta ee Mareykanka ayaa ka dambeysay, ka dib markii Israel ay horaantii bishaasi ay olole militari oo xoog leh ka bilowday deegaanada waqooyiga ee Marinka Gaza, iyadoona xanibtay kaalmadii bani’aadantinimo ee la gaynayay.
Hay’adaha caalamiga ah ayaa si adag uga digay tallaabooyinka dheeriga ah ee ay Israel uga sii dareyso xaaladda bani’aadantinimo ee Marinka Gaza.
Hay’adaha Qaramada Midoobey iyo kuwa kale ee caalamiga ah ee ka shaqeeya arrimaha bani’aadantinimada, isla-markaana ka hawlgala Marinka Gaza ayaa Jimcihii soo saaray digniin ku aaddan in macluul ay ku soo wajahan tahay waqooyiga Gaza.
Hay’adahan ayaa sheegay in shacabka faraha badan ee ku go’doonsan qaybaha waqooyi ee Gaza ay halis ugu jiraan inay u dhintaan gaajo iyo haraad. Hay’aduhu waxay sheegeen in iyadoo dadkaasi ay xaalad adag wajahayaan ay haddana Israel ugu dartay dil, dhaawac iyo xarig, isla-markaana ay jiraan boqolaal qof oo lagu qabqabtay hawlgalka halkaasi ka soconaya oo la geeyay goobo aan la garaneyn.
Madaxa Hay’adda Caafimaadka Adduunka (WHO), Tedros Ghebreyesus ayaa sheegay in dhaawacyada ay khatar ugu jiraan inay u dhintaan daryeel xumo. Isbitaalada waqooyiga Gaza keliya kama jirto sahay la’aan, balse waxay sidoo kale wajahayaan weeraro uga imanaya Ciidamada Israel. Ciidamadan ayaan haddii aysan gudaha u gelin isbitaaladaasi ay duqaymo u gaysanayaan.
Dhammaan hay’adaha caalamiga ah ayaa codsanaya in Israel lagu khasbo in ay joojiso gacanta adag ee ay ku wajaheyso dadka rayidka ah, isla-markaana ay qaaddo is hortaagga ay ku hayso gargaarka naf badbaadinta.
Guddiga Xuquuqul Insaanka Qaramada Midoobey ayaa Israel ku eedeeyay in Gaza ay ka gaysaneyso dembiyo dagaal iyo xasuuq.
Qaylo dhaanta iyo digniinaha ka soo yeeraya hay’adaha caalamiga ah ayaa ku soo aadaysa, iyadoo ay Talaadada ku egtahay waqtigii kama dambeysta ee Mareykanka uu u qabtay Israel.
Digniinta Mareykanka ayaa lagu sheegay tii ugu adkeyd ee Mareykanka u jeediyo Israel. Mareykanka waa dalka ugu weyn xulafada reer galbeedka ee taageerada ugu badan siiya Israel, isla-markaana ku ilaaliya Bariga Dhexe.
Warbaahinta gobolka iyo tan caalamka ayaa warineysa in isha lagu hayo tallaabada uu Maamulka Madaxweyne Joe Biden ee tartanka doorashada lagaga adkaaday ay qaadi karaan, haddii aanay waxba iska bedelin xaaladda liidato ee dadka Gaza.
Lixda toddobaad ee hawlgalka waqooyiga Gaza uu socdo, Israel ayaa uga sii dartay xaaladdii aadka u liidatay ee bani’aadantinimo ee muddaba ka jirtay Marinka Gaza.
Raashiinka, biyaha, shidaalka iyo sahayda dawada ayaa ah waxa loogu baahida badan yahay ee Gaza, iyadoo ciqaab wadareedka Israel ee ka dhanka ah dadka rayidka ah ay ku raadineyso guusha dagaal ee ay u baahan tahay, ee ah burburinta Ururka Xamaas.
13-kii bilood ee la soo dhaafay oo Ciidamada Israel ay kooxaha wax iska caabinta Falastiiniyiinta kula dagaalamayeen gudaha Gaza ayaan xaqiijin yoolashoodii dagaalka, aan ka ahayn in si bilaa kala sooc ah ay u xasuuqayaan dadka rayidka ah.
Khubarada militariga ayaa sheegaya in Ciidamada Israel ay ku jahwareersan yihiin dagaalkan, marka aad eegto in ay ka baxayaan dhul ay ku sugnaayeen, isla-markaana ay weerarayaan goobo kale oo la degan yahay iyagoo gumaad rayid ka gaysanaya, taasna ay ka baxsan tahay saddexdii hadaf ee ay Gaza ugu duuleen, ee kala ahaa wiiqitaanka Xamaas, dib u soo celinta Israeliyiinta lagu haysto gudaha Gaza iyo inaysan Gaza mustaqbalka khatar amni ku noqon Israel.