Hay’adda Qaramada Midoobey U Qaabilsan Gargaarka & Arrimaha Qaxootiga Falastiiniyiinta ee UNRWA ayaa sheegtay in 15 sano ay qaadan doonto in burburka laga nadiifiyo Marinka Gaza.
Hay’addan ayaa sheegtay in duulaanka Israel ee Marinka Gaza uu abuuray 40 milyan oo tan oo burbur ah.
“Waxay qaadan doontaa 15 sano in Gaza laga nadiifiyo burburka. Dagaalka Israel ee Gaza ayaa sababay 40 milyan oo tan oo burbur ah.” Ayay Hay’adda UNRWA ku sheegtay war ay soo saartay.
Warka ayaa lagu sheegay “Tani waxay u baahan doontaa in ka badan 100 baabuur, waxaana ku kacaya kharashka in ka badan shan boqol oo milyan oo dollar ($500M).”
UNRWA waxay sheegtay in haraaga uu sababay dagaalka ay ka koobnaan karaan bambaanooyin aan qarxin iyo walxaha kale ee waxyeelada gaysan kara, isla-markaana loo baahan yahay in walxahaasi laga nadiifiyo dhulka ciriiriga ah.
Saraakiisha UNRWA ayaa ka marqaati kacay muuqaalada naxdinta leh ee ka jira Marinka Gaza, gaar ahaan deegaanka Khan Yunis ee koonfurta Marinka Gaza oo ay booqdeen.
Scott Anderson, Kuxigeenka Iskuduwaha Gargaarka Bani’aadantinimo UNRWA ee Falastiin ayaa Warbaahinta u sheegay in xaalad naxdin leh uu ku soo arkay Khan Yunis.
“Waxaan Gaza joogay sagaal bilood, waxaana goobjoog u ahaa qaar ka mid ah muuqaaladii ugu naxdinta badnaa ee aan arko sagaalkii bilood ee aan halkan joogay.” Ayuu yiri Scott Anderson.
Waxa kaloo uu sheegay in xaalad aad u liidato oo bani’aadantinimo uu ku soo arkay Isbitaalka Nasser, oo ah kan hadda daryeelka ugu weyn siiya dadka ku sugan koonfurta Marinka Gaza.
“Xarunta caafimaadka aad bay u fidday. Hawada waxaa ka buuxsamay urta dhiigga.” Ayuu yiri Scott Anderson oo intaasi ku daray “Mid ka mid ah shaqaalaha caafimaadka ayaa dhiigga isaga xoqayay barkadda, isaga oo isticmaalaya biyo keliya, sababtoo ah ma jiraan sahay ku filan, oo ah walxaha jeermiska dila ama sahay kale oo nadiifin ah, si looga hortaggo fiditaanka caabuqa.”
Anderson ayaa sheegay in isbitaalka aysan oolin sariiro ku filan, dhaawacyada iyo bukaanadana la seexiyo dhulka iyo qolka kale ee sugitaanka, iyadoo aanay isbitaalku ka jirin wax jeermis dileyaal ah.
“Tanina waxay xitaa dhaawacyada la daweyn karo halis ugu jiraan in habka difaaca jirku uu si khaldan uga jawaabo la dagaalanka caabuqa iyo inay la kulmaan dhibaatooyin kaloo aad u badan.” Ayuu yiri Anderson.
Saraakiisha Hay’adda UNRWA ee ku sugan Marinka Gaza ayaa sheegaya in dadka rayidka ah aysan markan awoodin inay ka cararaan goobaha Israel ay colaadda ku baahineyso.
UNRWA waxay sheegtay in sagaal ka mid ah 10-kii qof ee Gaza ku nool ay barakaceen, qof walbana lagu khasbay inuu qaxo, marar badan.