Qoysaska iyo ehelada Israeliyiinta lagu haysto Marinka Gaza ayaa dib u bilaabay bannaanbaxyadii ay ku dalbanayeen in xubnaha qoysaskooda dib loogu soo celiyo guryahooda, xilli muddo bil ah laga joogo, markii Xoogaga Xamaas ay la haysteyaasha ka qafaasheen dhulka ay Israel maamusho.
Qoysaska iyo ehelada la haysteyaasha ayaa la sheegaya in ay ka quusteen rajadii ay maamulka ka qabeen in dadkaasi ay dib ugu soo celin doonaan guryahooda iyagoo badqaba, ka dib markii Ciidamada Israel ay ballaariyeen hawlgaladooda.
Dadkan ayaa gelinkii dambe ee Isniintii isugu soo baxay afaafka hore ee Xarunta Baarlamaanka Israel (Knesset) ee Magaalada Qudus (Jerusalem). Qaybtood ayaa xalay isu soo bax ka dhigay Magaalada Tel Aviv.
Wararka ayaa sheegaya in isu soo bixii shalay galab ay ka qaybgaleen saaxiibada la haysteyaasha, iyagoona cod kore ku dalbanayay in laga shaqeeyo sii deysmadooda.
Hoggaamiyaha Mucaaradka, Yair Lapid ayaa xalay fiidkii Jerusalem kula kulmay guddiga qoysaska la haysteyaasha, isagoona ka dhageystay walaaca ay qabaan.
Waxay sheegeen in ay ka baqdin qabaan tallaabo khaldan oo la qaado in ay halis gelin karto nolosha 241 qof oo Israeliyiin ah.
Afhayeenka Militariga Israel, Daniel Hagari ayaa mar sii horreysay sheegay in ciidamadu ay xoog ku soo furan doonaan la haysteyaasha.
Yair Lapid, Hoggaamiyaha Mucaaradka Israel ayaa Axaddii sheegay in ay taageeri doonaan heshiis kasta, oo horseedaya in si nabdoon ay guryahooda ugu soo laabtaan la haysteyaasha.
“Mucaaradku waxay taageeri doonaan tallaabo kasta iyo heshiis kasta, si kasta oo ay u fogaadaan, taas oo horseedaysa soo celinta kuwa la afduubay. Waa in dadkii la qafaashay ay soo laabtaan, waana waajib annagu inaan soo celino.” Ayuu yiri Yair Lapid.
Raysal Wasaare Benjamin Netanyahu ayaase ku hanjabay inaanay joojin doonin duulaankooda Gaza, illaa iyo inta laga soo sii deynayo maxaabiista.
Qoysaska iyo ehelada la haysteyaasha ayaa qorsheynaya in ay Israeliyiinta kale ugu baaqaan bannaanbaxyo waaweyn oo ay ka dhigaan magaalooyinka maamulkaasi, haddii Netanyahu aanu gorgortan la bilaabin Xamaas, si loo badbaadiyo nolosha dadkii lagu qafaashay weerarkii 7-dii October.