In ka badan 10 bilood oo dagaal ah, tirada dadka rayidka ah ee lagu dilay Marinka Gaza ayaa kor u dhaaftay 40 kun oo qof, sida ay xaqiijisay Wasaaradda Caafimaadka Gaza.
Wasaaradda Caafimaadka Gaza ayaa maanta sheegtay in tirada dadka rayidka ah ee la dilay, tan iyo markii uu dagaalku bilowday ay gaartay 40,005 qof iyo dhaawaca 92,401 qof.
Israel ayaa uga sii dareysa nolosha dadka rayidka ah, marka aad eegto in ay sii kordhineyso hawlgaladeeda xagga cirka oyo is hortaagga ay ku hayso waxyaabaha aasaasiga u ah nolosha.
Waxaa aad u yar rajada laga qabo in ay guuleystaan wada hadalada lagu wado inay dib uga bilowdaan dalka Qatar, sababtu tahay Israel oo aysan daacad ka ahayn in colaadda la soo afjaro.
Wada hadalada xabad joojinta Gaza ee u dhaxeeya Xamaas iyo Israel ayaa lagu wadaa in Khamiistan ay ka bilowdaan Caasimadda Doha, inkastoo Xamaas ay diiday ka qaybgalka wada hadaladaasi.
Xamaas ayaa Israel ku eedeysay in ay soo bandhigtay dalabaadyo cusub, waana wax ka duwan qodobadii ay doodaha ka yeesheen bishii July.
Xamaas ayaa dalalka dhexdhexaadiyeyaasha ee Qatar iyo Masar u sheegtay in doodaha iyo gorgortanka ay tahay in lagu saleeyo ajandeyaashii ay aqbaleen 2-dii bishii July, si xabad joojin looga dhaqangeliyo Marinka Gaza, maxaabiistana la isku dhaafsado, isla-markaana aanay aqbali doonin gorgortanka cusub ee Israel.
Dowladaha Masar iyo Qatar ayaa wada dadaalo ay isugu soo dhaweynayaan labada dhinac, si loo xaqiijiyo in la gaaro heshiiska aadka loogu baahan yahay.
Dagaalka Gaza ayaa laga cabsi qabaa inuu isku bedelo mid gobolka oo dhan ah, waana walaac caalami ah oo maanta jira.