Raysal Wasaaraha Israel, Benjamin Netanyahu ayaa xalay sheegay in ciidamadiisa ay beegsadeen goob ay ku sugnaayeen Taliyaha Militariga Xamaas, Mohammed Deif iyo kuxigeenkiisa Rafa Salama, ka dib duqayn ay ka gaysteen deegaanka Al-Mawasi ee koonfurta Marinka Gaza.
Raysal Wasaaraha oo shir jaraa’id ku qabtay Magaalada Tel Aviv ayaa sheegay inaysan kala caddeyn in labadaasi nin ay ku dhinteen duqayntii shalay iyo in kale.
Waxa uu sheegay in uu bixiyay amarka weerarka, ka dib markii lala wadaagay in halkaasi ay ku sugan yihiin saraakiil ka tirsan Ururka Xamaas.
Raysal Wasaaraha ayaa ku hanjabay in Israel ay beegsan doonto Saraakiisha Xamaas, ciidamaduna ay sii wadi doonaan dagaalka lagu wiiqayo cududda militari ee Xamaas, illaama ay ka xaqiijinayaan ujeedooyinkooda dagaalka.
Netanyahu ayaa sheegay in cadaadiska militari ee Xamaas uu yahay habka ugu wanaagsan ee lagu gaari karo heshiis lagu soo celinayo la haysteyaasha Israeliyiinta ee lagu haysto Marinka Gaza.
“Waxaan la kulmi doonnaa dhamaman Hoggaanka Xamaas.” Ayuu yiri Netanyahu oo intaasi raaciyay “Waxaan kordhinaynaa cadaadiska militari ee Xamaas, taasoo sare u qaadi doonto fursadaha heshiiska lagu soo celinayo la haysteyaasha.”
Netanyahu ayaa ku andacoonaya in tallaabooyinka dheeriga ah ee Tel Aviv aysan waxba u dhimi doonin hindisaha Madaxweyne Joe Biden ee xabad joojinta Gaza iyo weliba dalabaadka aasaasiga ah Israel ee heshiiska maxaabiis is dhaafsiga.
“Kama dhaqaaqin milimitir qaab dhismeedka uu soo bandhigay Madaxweyne Biden, laakiin sidoo kale uma ogolaanayo Xamaas inay guurto hal milimitir.” Ayuu yiri Netanyahu.
Mohammed Deif waxaa lagu tilmaamaa ninka labaad ee ay Israel ugu doon-doonista badan tahay, marka laga soo taggo Yahya Sinwar, oo ah Gudoomiyaha Marinka Gaza.
Wasaaradda Caafimaadka Gaza ayaa xaqiijisay in 90 qof ay ku dhinteen duqayntaasi, illaa 300 oo kalena ay ku dhaawacmeen.
Diyaaradaha dagaalka Israel ayaa duqayntan ka gaystay goob ay degan yihiin dadka barakacayaasha ah ee sida khasabka ah looga soo barakaciyay guryahooda.
Israel ayaa dadkan rayidka ah ku leysay goob ay ku sheegtay aag bani’aadantinimo, isla-markaana ay shacabka fartay in ay gabaad u doontaan.
Xamaas ayaa war ay soo saartay ku sheegtay in Netanyahu uu fashilinayo wada-xaajoodyada hindisaha xabad joojinta Gaza iyo maxaabiis is weydaarsiga labada dhinac.
Warbaahinta caalamiga ah ayaa Saraakiisha Xamaas ka soo xiganeysa, iyagoo Israel ku eedeynaya inaysan daneynayn heshiis xabad joojineed.
Wareeggii ugu dambeeyay ee wada hadaladii ka qabsoomay dalalka Masar iyo Qatar ayaa la sheegaya in natiijo la’aan ku soo dhammaadeen.
Madaxweyne Biden oo Jimcihii taageereyaashiisa kula hadlayay Magaalada Detroit ee Gobolka Michigan ayaa ballanqaaday in dowladdiisu ay soo afjari doonto colaadda Gaza, isagoo garowsan in caqabado badani ay jiraan.
Biden ayaa ku adkeystay inaanu ka bixi doonin tartanka doorashada November, si afar sano oo kale uu talada maamulka u sii wado.
Biden ayaa fahamsan in sii socoshada duulaanka Israel ee Marinka Gaza uu caqabad ku yahay ololaha dib u doorashadiisa, waana tan ku riixeysa in Netanyahu iyo kooxdiisa uu gacmaha qabto, si loo joojiyo dhiigga daadanaya.