Raysal Wasaaraha Israel, Benjamin Netanyahu ayaa ka hadlay amarka ka soo baxay Maxkamadda Dembiyada Caalamiga ah (ICC) ee lagu soo xirayo isaga iyo Wasiirkiisii hore ee Difaaca, Yoav Gallant.
Maxkamadda ayaa sheegtay in labadoodaba loo haysto dembiyo ka dhan ah bani’aadantinimada iyo dembiyo dagaal, oo ay gaysteen intii u dhaxeysay 8-dii bishii October ee sanadkii hore illaa 20-kii bishii May ee sanadkan. Maxkamaddu waxay kaloo amar ku bixisay in la soo xiro Mohammed Deif, Taliyaha Garabka Militariga Xamaas ee Guutooyinka Al Qassam.
Raysal Wasaaraha Israel ayaa been abuur ku tilmaamay dacwadda loo haysto, isagoona dhalleeceeyay eedeymaha ay maxkamadda u soo jeedisay.
Waxa uu sheegay in si karaahiyo leh uu u diidayo, waxa uu ugu yeeray wax aan caqli gal ahayn iyo ficilo been abuur ah oo maxkamaddu ay ku soo eedeysay inay ku kaceen.
Raysal Wasaaraha oo cambaareeyay go’aanka maxkamadda ayaa dhanka kale waxa uu ku tilmaamay mid muujinaya naceyb ka dhan ah Israel.
Netanyahu ayaa intaasi ku daray inaanay jirin wax xadgudub ah oo Israel ay ku kacday, marka laga soo tago dagaalka ay ka waddo Gaza.
Yoav Gallant, Wasiirkii hore ee Difaaca Israel ayaa dhankiisa waaranka ICC ku tilmaamay hordhac khatar ah, sida uu yiri.
“Go’aanka Maxkamadda Hague waa mid la xusuusan doono weligeed. Wuxuu dhigayaa in Dowladda Israel iyo hoggaamiyeyaasha gacan ku dhiigleyaasha ah ee Xamaas ay isku saf yihiin, wuxuuna sharciyeynayaa dilka dhallaanka, kufsiga haweenka iyo afduubka waayeelka ay Xamaas ku kacday.” Ayuu yiri Gallant.
Gallant ayaa hadalkiisa ku xoojiyay “Go’aanku wuxuu dhigayaa tusaale khatar ah oo liddi ku ah xuquuqda is difaaca iyo dagaalka anshaxa ee Israel, wuxuuna dhiirigelinayaa argagixisada dilaaga ah.”
Inkastoo Israel aysan ka mid ahayn dalalka saxiixay maxkamadda, haddana waaranka ayaa Netanyahu iyo Gallant ka mamnuucaya in ay taggaan 124-ka dal ee xubnaha ka ah ICC.