Midowga Yurub ayaa si kulul u cambaareeyay warka ka soo yeeray Wasiirka Maaliyadda Israel, Bezalel Smotrich ee uu qiilka ugu yeelay in gaajo loo dili karo dadka reer Gaza.
Midowga Yurub ayaa bayaan ay soo saareen ku sheegay in hadalka Wasiirka xagjirka ah uu ka tarjumayo, sida aanu u xaq dhowreynin mabaadii’da aasaasiga ah ee bani’aadantinimada.
Josep Borrell, Madaxa Siyaasadda Arrimaha Dibadda ee Midowga Yurub oo bayaanka ku saxiixnaa ayaa sheegay in gaajeysiinta ula kaca ah ee dadka rayidka ah ay tahay dembi dagaal.
“Wasiir Smotrich wuxuu sheegay in laga yaabo inay xaq iyo akhlaaq tahay in Israel loo ogolaado inay gaajo u disho laba milyan oo qof oo rayid ah, si la haysteyaasha loo soo celiyo, waa wax aan sharaf lahayn.” Ayuu yiri Josep Borrell.
Waxa uu sheegay inay filayaan in Xukuumadda Raysal Wasaare Benjamin Netanyahu ay iska fogeyso hadalka Wasiirka midigta fog.
“Waxaan filaynaa Dowladda Israel in si aan mugdi ku jirin ay isaga fogeyso hadalka Wasiirka.” Ayuu yiri Borrell oo intaasi ku daray “Waxay muujineysaa mar labaad, sida uu u quursanayo sharciga caalamiga ah iyo mabaadii’da aasaasiga ah ee bani’aadantinimada.”
Midowga Yurub ayaa ballanqaaday inay gargaar gayn doonaan Marinka Gaza, haddii aysan jirin wax kaloo doorasho ah.
Diblomaasiga ugu sarreya Midowga Yurub ayaa dhanka kale ugu yeeray Israel inay soo caddeeyaan falalka xadgudubyada ah ee laga soo sheegay xabsiga Sde Teiman, oo la sheegayo in si xun loogu jirdilo maxaabiista Falastiiniyiinta, kufsina loogu gaysto.
Dhanka kale Dowladaha Jarmalka iyo Faransiiska oo xubin ka ah Midowga Yurub ayaa sidoo kale si adag u cambaareeyay warka ka soo yeeray Smotrich, iyagoona Israel ka dalbaday inay cambaareyso, warkiisana ay iska bari yeesho.
Smotrich ayaa Isniintii sheegay inay macquul tahay inay gaajo u dilaan in ka badan laba milyan oo qof oo ku nool Marinka Gaza, si ay u soo daayaan la haysteyaasha Israeliyiinta ee Gaza lagu haysto.
Warkiisan ayaa dhaliyay carro caalami ah, inkastoo uu muddo dheer xukuumadda ku cadaadinayay in la sii wado dilka iyo gaajeysiinta lagu hayo dadka rayidka.
Wasiirka Amniga, Itamar Ben-Gvir iyo Wasiirka Maaliyadda, Bezalel Smotrich waxaa lagu tilmaamaa labada nin ee ugu xagjirsan ee ka tirsan xukuumadda isbahaysiga ah ee Benjamin Netanyahu uu hoggaamiyo.
Wasiiradan ayaa hortaagan in la soo afjaro dagaalka Gaza, xukuumadduna ay qaadato heshiiska maxaabiis is dhaafsiga ee Mareykanku uu gadaal ka riixayo, iyagoona si joogta ah ugu hanjaba inay dumin doonaan xukuumadda, haddii aan codkooda la dhageysan. Wasiiradan axsaabta midigta fog ayaa wax ka soo dhisay xukuumadda la wada leeyahay.
Warbaahinta Israel ayaa muddooyinkanba ku warameysay in labadan nin ay yihiin caqabadda keliya ee muuqato ee hortaagan in xal laga gaaro dagaalka sii daba dheeraaday.
Warbaahintu waxay sheegtay in Netanyahu uu ku gowracan yahay in uu u hoggaansamo dalabaadkooda, si uu uga cararo doorasho waqtigeeda laga soo hormariyay.
Xulafada Israel ee Mareykanka iyo Midowga Yurub ayaa muddo dheer ku cadaadinayay Netanyahu in uu qaato heshiis si toos ah loogu soo afjarayo dagaalkan lagu hoobtay, balse aanu wax ixtiraam ahi u muujineyn, isagoo taasi bedelkeeda diiradda saaraya, sidii uu u dhameysan lahaa waqtiga uga harsan muddo xileedkiisa oo ku eg sanadka 2026.
Israel ayaa wajaheysa cambaareyn caalami ah, sababtoo ah tirada badan ee dhimashada & dhaawacyada ee dadka rayidka ah iyo dhibaatooyinka ba’an ee bani’aadantinimo ee ka jira dhulka sida weyn loo go’doomiyay.
Tobankii bilood ee dagaalkan uu socday ayaa Gaza lagu dilay ku dhawaad 40 kun oo qof oo shacab ah, sida ay sheegtay Wasaaradda Caafimaadka Gaza.