Madaxweynaha Jamhuuriyadda Somaliya, Xasan Sheekh Maxamuud ayaa maanta Magaalada Muqdisho ka furay Shirweynaha Wadatashiga ee Dalladda Bulshada Bariga Afrika (EAC).
Madaxweynaha ayaa sheegay in dadka iyo Dowladda Soomaaliyeed ay ka go’an tahay deris wanaagga iyo in la xoojiyo iskaashiga heer gobol, si waafaqsan danaha wadajirka ah.
Madaxweynaha ayaa sheegay in Dowladda Somaliya ay ka go’an tahay dhiirigelinta maalgashiga iyo in dowladuhu si sharci ku wadaagaan fursadaha jira.
Madaxweynaha oo soo hadalqaaday damaca ay Dowladda Itoobiya ku dooneyso qayb ka mid ah biyaha Somaliya ayaa tilmaamay in uu yahay mid meesha ka saaraya iskaashiga iyo wax isdhaafsiga dowladaha, isla markaana wiiqaya nabadda iyo xasilloonida gobolka.
“Waxaan ummadda soomaaliyeed iyo caalamkaba u caddeynayaa, Itoobiya waxaan isku haysanaa qaabka sharci darrada ah ee ay dooneyso in ay baddeenna ku soo gaarto, waxaan doonaynaa in ay baddeenna ku timaado hab sharci ah, sida Uganda ay ku gaarto Badda Kenya iyo sidoo kale sida Itoobiya qudheedu ay ku gaarto Badda Jabuuti.” Ayuu yiri Madaxweynuhu.
Shirkan oo ay ka soo qaybgaleen xubno ka tirsan Golaha Wasiirada, khubarada dhaqaalaha, Safiiro iyo wakiillo ka socday jaamacadaha dalka ayaa lagu soo bandhigay qorshaha Somaliya ee Dalladda Bulshada Bariga Afrika, gaar ahaan fursadaha ugu jira ganacsatada iyo bulshada rayidka ah.
Sidoo kale khubarada ayaa si qoto dheer u fallanqeynaya hannaanka loo horumarinayo xiriirka ganacsi iyo midka bulshada ee ka dhaxeeya Somaliya iyo dalalka kale ee ku bahoobay Dalladda Bulshada Bariga Afrika.
Madaxweyne Xasan Sheekh Maxamuud ayaa khudbaddiisa ku adkeeyay muhiimadda ay leedahay in la helo iskaashi iyo wadajir, si loo horumariyo dhaqaalaha dalka, loona abuuro fursado shaqo oo waara.
Somaliya ayaa 15-kii bishii December si rasmi ah uga mid noqotay dalalka xubnaha ka ah Dalladda Bulshada Bariga Afrika ee loo yaqaano (EAC).
Ku biirista Somaliya ee Dalladda EAC ayaa loo arkaa mid horseedeysa xilli cusub oo kordhin ah, maadaama muhiimadda juqraafiyeed ee Somaliya ay sare u qaadi doonto muhiimadda bulshada gobolka.
Somaliya ayaa noqoneysa dalkii 8aad ee ka mid noqdo EAC, si ay u ballaariso ganacsiga xorta ah ee gobolka.
Dalalka xubnaha ka ah Dalladda EAC ayaa kala ah Tanzania, Rwanda, Burundi, Uganda, Kenya, South Sudan, Somalia iyo Jamhuuriyadda Dimoqraadiga ee Congo.
