Ciidanka Cirka Israel ayaa sii wada weerarada aysan u meel dayeynin ee ay ka gaysanayaan Marinka Gaza oo dhan, iyadoona uu isa soo tarayo khasaaraha dadka rayidka ah.
Wasaaradda Caafimaadka Gaza ayaa sheegtay in tan iyo 7-dii October, tirada dadka rayidka ah ee ku baxay gacanta Ciidamada Israel ay gaartay 38,011 qof.
“Wasaaradda ayaa illaa iyo hadda diiwaangelisay dhimashada 38,011 qof iyo dhaawaca 87,445 qof.” Ayay wasaaraddu ku sheegtay war ay soo saartay.
Wasaaradda ayaa sheegtay in inta badan dadka ku dhintay weerarada Ciidamada Israel ay yihiin dumar iyo carruur.
Saraakiisha Qaramada Midoobey ayaa wasaaradda ku raacsan in dhibaneyaasha dagaalkan ay u badan yihiin hooyooyin iyo dhallaan.
Weerarada xargaha goostay ee Ciidamada Israel ayaa halis gelinaya nolosha 2.3 milyan oo Falastiiniyiin ah oo ku nool Marinka Gaza, sida ay sheegtay Qaramada Midoobey.
Israel ayaa cambaareyn xoog leh kala kulantay qaabka ay u waddo dagaalkan, ay sheegtay in ay ku burburineyso Ururka Xamaas.
Diyaaradaha dagaalka Israel ayaa si ula kac ah u beegsanaya goobaha ay dadka rayidka ah ku badan yihiin, taas oo sababtay dhimashada iyo dhaawaca faraha badan ee shacabka.
Israel ayaa leynaysa dadka reer Gaza, iyada oo ay la ildaran yihiin cunto xumo, biyo, dawo iyo shidaal la’aan.
Bulshada caalamka ayaa dagaalkan u aragto mid ka dhan ah shacabka aan hubeysneyn, walow ay Israel dooddeedu tahay mid ay ku bartilmaameedsaneyso kaabeyaasha militari ee Xamaas.
Israel ayaa diidan in ay dembiyo dagaal ka gaysatay Marinka Gaza, waana xilli ay hay’adaha caalamiga ah qirayaan in ciidamadeedu ay xitaa hortaagan yihiin gargaarka naf badbaadinta ah.
In dadka rayidka ah la laayo iyo in raashiinka loo adeegsado sida hub oo kale ayaa baalmarsan shuruucda caalamiga ah ee bani’aadantinimada iyo kan dagaalka.
Dagaalkan ayaa si weyn u dhaawacay muuqaalkii Israel ee dunida, iyadoo markii horeba aan looga baran inay ilaaliso xuquuqda aadanaha. Tani waa mid ka mid ah sababaha aysan bulshada caalamka u jecleen.