Ururka Xamaas ayaa si kulul u cambaareeyay taageerada militari ee Mareykanka uu siiyo Israel, iyadoo uu ururku sheegay in hubkii Mareykanka lagu leynayo carruurta iyo dumarka reer Gaza.
“Waxaan si adag u cambaareynaynaa taageerada militari ee Mareykanka uu ku siinayo Sahyuuniyadda gumaadka shacabkeenna.” Ayaa lagu yiri bayaan ay soo saartay Xamaas.
“Waxaan kaloo cambaareynaynaa taageerada uu Mareykanku ku bixinayo daadinta dhiigga carruurta iyo haweenka ee dadkayaga Falastiiniyiinta, iyagoo cadowgan siinaya dhammaan noocyada hubka.” Ayaa lagu yiri bayaanka.
Xamaas ayaa sheegtay in hubka Mareykanka uu siinayo Israel ay ku jiraan kuwa dunida ka mamnuuca ah in la adeegsado.
Xamaas waxay sheegtay in Israel ay dagaalka u adeegsaneyso hubka mamnuuca ah, taasoo aad ka garan karto heerka gubashada saddexaad ee ka dhashay hubkaasi.
Dhakhaatiirta caafimaadka ayaa laga soo xigtay in dadka dhaawacmay ay isbitaalada soo gaarayaan, iyagoo qaba gubashada heerka saddexaad ee ka dhashay hubka caalamiga ah ee la mamnuucay, sida bambooyinka kuleylka.
“Hubkan ayaa sababa in walxaha kiimikaad ay la falgalaan maqaarka, waxayna si toos ah u sababaan daxalka kiimikaad ee nudaha ku jira meydka shuhadada iyo kuwa dhaawacmay. Waxay kaloo keenaan xanuun daran.” Ayay Xamaas ku sheegtay bayaankeeda.
Xamaas waxay sheegtay in dhibaneyaal badan ay ku dhinteen wax ka yar hal maalin, ka dib markii ay ku dhaawacmeen hubkan halista ah.
Xamaas ayaa xustay in Mareykanku uu si buuxda uga masuul yahay hubeyntiisa Israel iyo sababta weeraradeeda galaafanaya nolosha dadka faraha badan.
Axaddii, Xamaas ayaa ku dhawaaqday inay ka baxday wada hadaladii xabad joojinta iyo maxaabiis is dhaafsiga ee iyaga iyo Israel.
Wada hadalada oo markii horeba aan cago badan ku taagneyn ayay Xamaas go’aankeeda u sababeysay duqayntii dadka faraha badan ku dhinteen ee ay Israel Sabtidii ka gaysatay goobta ay ku badan yihiin dadka barakacayaasha ee ku taala deegaanka Al-Mawasi ee koonfurta Marinka Gaza.
Wasaaradda Caafimaadka Gaza ayaa kol dambe sheegtay in 92 qof ku dhinteen duqayntaasi, 300 oo kalena ay ku dhaawacmeen.
Saraakiisha Xamaas ayaa Warbaahinta caalamiga ah u sheegay in Israel aysan daacad ka ahayn hindisaha Madaxweynaha Mareykanka, Joe Biden ee xabad joojinta Gaza iyo is weydaarsiga maxaabiista.
Wareeggan ugu dambeeyay ee wada hadalada ayay dad badani rajo ka qabeen inay horseedi doonaan in la joojiyo dhiigga shacabka aan hubeysneyn ee ay Israel daadineyso.
Wada hadaladan oo Qatar iyo Masar ay dhexdhexaadinayeen, isla-markaana uu Marekanku gadaal ka riixayay ayaa istaagay, ka dib markii wafdigii Israel ku metelayay wada hadaladaasi ay Jimcihii si lama filaan ah ugu laabteen Tel Aviv, waxaana xigay tallaabooyin ay Israel ku ballaarineyso duqaymaheeda Marinka Gaza.