Raysal Wasaaraha Somaliya, Xamse Cabdi Barre ayaa xalay ku hoyday Magaalada Baydhabo ee Xarunta KMG ee Dowlad Goboleedka Koonfur Galbeed, isagoo xal u raadinaya khilaafka Dowladda Federaalka kala dhaxeeya Koonfur Galbeed.
Raysal Wasaaraha oo Arbacadii gaaray Baydhabo ayaa isku dayaya in la dhameeyo khilaafka Dowladda Federaalka iyo Maamulka Madaxweyne Cabdicasiis Xasan Maxamed (Laftagareen), kaas oo daaran arrimo kala duwan.
Khilaafka labada dhinac ayaa meeshii ugu sarreysay gaaray, ka dib markii Dowladda Federaalka ay dalbatay in Ciidamada Itoobiya ay isaga baxaan dalka, marka uu dhammaado waqtiga Hawlgalka Ciidanka Nabad Ilaalinta Midowga Afrika ee ATMIS oo ku eg 31-ka bisha December ee sanadkan. Sidoo kale Dowladda Federaalka ayaa ka soo horjeeddo in Ciidamada Itoobiya ay ka mid noqdaan Hawlgalka AUSSOM ee bedelaya midka ATMIS.
Madaxweyne Laftagareen ayaase ka shaqeynaya in Militariga Itoobiya ay sii joogaan deegaanada Koonfur Galbeed, isagoo ku andacoonaya in xilligan aysan suurtagal ahayn inay ka baxaan Koonfur Galbeed, marka aad eegto inay dhibaato amni ka haysato maleeshiyada Al Shabaab. Arrintan ayaa waxaa Madaxtooyada Koonfur Galbeed ku taageeray xubno ka tirsan Xildhibaanada Golaha Shacabka ee Baarlamaanka Federaalka, iyadoo kuwo kalena ay si weyn uga horyimaadeen.
Horaan, Villa Somalia ayaa sheegtay in Ciidamada Itoobiya aysan ka mid noqon karin hawlgalka cusub ee Dowladda Federaalka lagaga taageerayo la dagaalanka Al Shabaab iyo xaqiijinta nabadgelyada dalka, illaa ay Addis Ababa ka laabaneyso heshiiskii is afgaradka badda ee ay la gaartay Somaliland.
Wararka ayaa sheegaya in Villa Somalia ay qorsheynayso in booska Militariga Itoobiya lagu bedelo ciidamo ka socdo dalka Masar, iyadoo Masar iyo Jabuuti ay yihiin labada dal ee illaa iyo hadda la ogyahay inay Dowladda Federaalka aqbashay ciidamada ay ku yabooheen hawlgalka cusub ee Midowga Afrika ee dalka, kaas oo si rasmi ah 1-da bisha January ee sanadka 2025 ugu hawlgali doona magaca AUSSOM. 
Dhanka kale Raysal Wasaaraha Xukuumadda Federaalka ayaa Madaxweynaha Koonfur Galbeed iyo Golihiisa Wasiirada kala hadlaya arrinta doorashada maamulkaasi, maadaama muddo xileedka Madaxweyne Laftagareen uu ku ekaa 19-kii bishii December ee sanadkii 2022, inkastoo mar dambe muddo kordhin loo sameeyay.
Golaha Wadatashiga Qaran ayaa bartamihii sanadkii 2023 go’aamiyay in doorashada Koonfur Galbeed la qabto bisha November ee sanadkan. Golaha ayaa xilligaasi xilheynta Madaxweyne Laftagareen ugu kordhiyay, illaa dhammaadka bisha October ee 2024.
Golaha Wadatashiga Qaran ayaa sidoo kale ku heshiiyay in doorashada Dowlad Goboleedyada uu muddo xileedkoodu dhammaaday la qabto daba-yaaqada sanadkan, doorashaduna ay noqoto mid qof iyo cod ah.
Inkastoo aysan suurtagal ahayn in doorasho qof iyo cod ah laga qabto Gobolada Koonfurta & Bartamaha Somaliya, sababo la xiriira dhibaatada amni ee dalka ka jirta, haddana Madaxweyne Laftagareen ayaa doonaya in Baydhabo laga qabto doorasho dadban oo maamulkiisu uu maamulayo, taas oo Dowladda Federaalka ay ka biyo diidan tahay.
Dowladda Federaalka ayaa riixeysa in Guddiga Doorashooyinka Qaranka ee la magacaabi doono ay maamulaan doorashada Koonfur Galbeed.
Dowladda Madaxweyne Xasan Sheekh Maxamuud ayaa la fahamsan yahay inaysan diidaneyn in Xildhibaanada Baarlamaanka Koonfur Galbeed ay soo doortaan Madaxweynaha, ha yeeshee ay gebi ahaanba ka soo horjeeddo in Madaxtooyada Koonfur Galbeed ay maamusho doorashadaasi.
Qodobkan ayaa ah kan ugu weyn ee ay labada dhinac isku hayaan, waana kan uu is mari-waagu ka taagan yahay, iyadoo aysan muuqan in wax tanaasul ahi ay ka sameynayaan.
Dhawaan, Madaxweyne Laftagareen oo looga yeeray Caasimadda Muqdisho ayaa ku gacan seyray Dowladda Federaalka, waxaana uu labada xafiis ee dalka ugu sarreya ku wargeliyay inaanu u soo socon Muqdisho, tanina waxay keentay in Raysal Wasaaraha Xukuumadda uu isagu u kicitamo Baydhabo.
Ma cadda, sida wafdiga Raysal Wasaare Barre ee ku sugan Magaalada Baydhabo ay xal ugu heli karaan khilaafka ka taagan cidda maamuleysa doorashada Koonfur Galbeed.