Taliska Ciidanka Asluubta Soomaaliyeed ayaa ku dhawaaqay in la soo geba-gabeeyay weerar ay maanta kooxo hubeysani ka gaysteen Xabsiga Dhexe ee Xamar.
Afhayeenka Ciidanka Asluubta, Korneyl Cabdiqani Maxamed Khalaf oo shir jaraa’id ku qabtay Magaalada Muqdisho ayaa sheegay in abaare 8:45 subaxnimo ay kooxo nabadiid ah isku dayeen inay qalqal ka abuuraan Xabsiga Dhexe, inkastoo aanu sheegin waxa uu ujeedkoodu ahaa iyo cidda ay ka tirsan yihiinba.
Afhayeenka ayaa waxa uu sheegay in ciidamadu ay soo afjareen kooxihii weerarka soo qaaday.
“Kooxahaas waa la soo afjaray, hawlgalkiina wuxuu soo geba-gaboobay shan shaac (11:00am), oo Ciidanka Asluubta ay soo geba-gabeeyeen.” Ayuu yiri Afhayeenka.
Afhayeenka ayaa tilmaamay in xaaladda Xabsiga Dhexe ay hadda tahay mid degan, isagoona yiri “Hadda xabsigu xaaladdiisu way degan tahay, dhaawacyadii baana la daweynayaa.”
Mar uu ka hadlayay khasaaraha ka dhashay weerarka ayuu sheegay in maxaabiista ay ka dhimatay shan maxbuus, 18 kalena ay ka dhaawacantay, isaga oo intaasi ku daray in ciidankana ay ka dhinteen saddex askari, saddex kalena ay ka dhaawacantay.
“Waxaa maxaabiista ka dhintay shan maxbuus, waxaana ka dhaawacmay sideed iyo toban. Askarta waxaa ka dhintay saddex, waxaana ka dhaawacmay saddex kale.” Ayuu yiri Korneyl Cabdiqani Maxamed Khalaf, Afhayeenka Ciidanka Asluubta.
Korneyl Khalaf ayaa dhanka kale sheegay in la baari doono sababihii ay waxaan u dhaceen iyo haddii ay dayacaad dhanka ciidamada ahba ay jirtay.
Weerarkan uma muuqan mid dibadda looga soo qaaday xabsiga, iyadoo ay ilo wareedyo sheegayaan in lagu qorsheeyay gudaha xabigan, oo si weyn amnigiisa loo ilaaliyo.
Wararka ayaa sheegaya in dhowr nin oo ka tirsan maleeshiyada Al Shabaab ay ka dhex dagaalameen gudaha xabsiga.
Raggan ayaa iska horimaad adag la galay Ciidanka Ilaalada Xabsiga Dhexe, mana cadda sida uu gacantooda ku soo galay hubkii ay ku dagaalamayeen.
Ilo wareedyadu waxay kaloo sheegayaan in raggan ay ka tirsan tirsan yihiin xubnaha Shabaabka ee kol hore ay xukunada ku ridday Maxkamadda Ciidamada Qalabka Sida.
Intii ay xabaddu socotay Dowladda Federaalka ayaa ciidan ku soo daadisay waddooyinka soo gala Xabsiga Dhexe, si looga hortaggo in maxaabiista qaybtood ay xabsiga ka baxsadaan.
10-kii bishii August ee sanadkii 20120 ayuu sidaan oo kale uu weerar uga dhacay Xabsiga Dhexe ee Xamar, markaas oo Al Shabaab ay sheegatay masuuliyadda weerarka.
Weerarkaas ayaa waxaa ku dhintay 19 qof, iyadoo toddobo kalena ay ku dhaawacantay, kuwaa oo isugu jiray 15 maxbuus iyo afar askari, sida uu xilligaasi xaqiijiyay Taliska Ciidanka Asluubta.
Maxbuus Shabaab oo dil ku xukunaa ayay xilligaasi u suurtagashay in uu ka baxsado xabsigan, balse ma cadda haddii weerarkan ugu dambeeyay ay wax maxaabiis ahi kaga fakadeen xabsigaasi.
Weerarkan ayaa noqonaya kiisii labaad ee ka dhaca Xabsiga Dhexe ee Xamar, tan iyo dib u yegleeliddii Dowladnimada Somaliya, oo 24 sano laga joogo.