Wasiirada Arrimaha Dibadda ee Mareykanka, Antony Blinken iyo Ingiriiska David Lammy ayaa maanta safar dhinaca dhulka ah ku tegay dalka ay dagaaladu halakeeyeen ee Ukraine.
Wasiiradan oo tareen ka raacay dalka Poland ayaa Caasimadda Kyiv kula kulmay Madaxweynaha Ukraine, Volodymyr Zelensky, kaas oo marar badan ku baaqay in xulafada reer galbeedka ay qaadaan xayiraadaha Ukraine ka saaran in gantaalahooda ridada dheer lagu weeraro bartilmaameedyada militari ee gudaha Ruusha.
Mareykanka iyo Ingiriiska ayaan Ukraine siinin ogolaanshaha ay u baahan tahay, sababo ku aaddan cabsida laga qabo isku dhac ballaaran. Labadan dal ayaa horey Ukraine ugu ogolaaday inay gantaalahaasi ku weerari karto goobo cayiman.
Wasiir Blinken oo ka hadlayay shir jaraa’id, oo ay ku wehlinayeen dhiggiisa Ingiriiska iyo kan Ukraine ayaa sheegay in Madaxweynaha Mareykanka, Joe Biden ay u badan tahay in arrinta gantaalaha ridada dheer uu Jimcaha kala hadli doono Raysal Wasaaraha Ingiriiska, Keir Starmer. Labada hoggaamiye ayaa lagu wadaa in ay Jimcaha ku kulmaan Magaalada Washington.
Blinken ayaa walaac ka muujiyay gantaalo ballaastik ah, oo sida uu sheegay ay Iran siisay Dowladda Ruushka, si ay ugu adeegsato dagaalka Ukraine.
“Tani waxay sii xoojin doontaa gardarrada Ruushka iyo Putin ee ka dhanka ah Ukraine.” Ayuu yiri Antony Blinken, Wasiirka Arrimaha Dibadda Mareykanka.
Wasiirka Arrimaha Dibadda Ingiriiska ayaa dhankiisa sheegay inaysan Ukraine siineyn fasaxa ay u baahan tahay, haddana wuxuu sheegay inaysan dooneyn in Ruushka uu ku adkaado dagaalkan.
Wasiirka cusub ee Arrimaha Dibadda Ukraine, Andrii Sybiha ayaa sheegay in tallaabooyinka xayiraadda lagu qaadayo ay muhiim u yihiin, marka loo eego buu yiri gantaalaha ballaastikada ah ay Iran ku wareejisay Ruushka.
Moscow iyo Tehran waxay labaduba si adag u beeniyeen eedeymaha isa soo taraya ee loo jeedinayo Dowladda Iran.
Volodymyr Zelensky, Madaxweynaha Ukraine ayaa Arbacadan ku celiyay in guusha dalkiisa ee dagaalka ay ku xiran tahay, iyadoo la qaado xayiraadda gantaalahan.
Madaxweyne Zelensky ayaa sidoo kale sheegay in inta badan guusha Kyiv ay ku xiran tahay taageerada Mareykanka. Mareykanka waa dalka ugu weyn ee Ukraine siiya kaalmada militari.
