Wasiirka Arrimaha Dibadda Mareykanka, Antony Blinken ayaa Axaddan gaaray Israel, si uu u riixo dadaalada caalamiga ah ee xabad joojinta looga sameynayo Marinka Gaza.
Wasiirka ayaa Madaxda Israel ku cadaadin doono dhameystirka hindisaha xabad joojinta Gaza iyo heshiiska maxaabiis is dhaafsiga ee Xamaas iyo Israel.
Mareykanka ayaa dadaal badani ku bixinaya wax ka qabashada Wasiirada xagjirka ah ee ka tirsan xukuumadda uu hoggaamiyo Raysal Wasaare Benjamin Netanyahu, kuwaa oo si weyn uga soo horjeedo in la soo afjaro dagaalkan.
Madaxweyne Joe Biden ayaa habeen hore uga digay dhammaan dhinacyada ku lugta leh wada-xaajoodyadan inay carqaladeeyaan, isagoona adkeeyay in ay tahay in ay ka fogaadaan wax kasta oo wiiqi kara dadaalada caalamiga ah ee socda.
Dalalka dhexdhexaadiyeyaasha ayaa habeenkii Jimcaha soo bandhigay hindise cusub oo xabad joojin ah, isla-markaana horseedaya in maxaabiista la sii daayo.
Bayaan ay si wadajir ah u soo saareen Mareykanka, Qatar iyo Masar ayaa lagu sheegay in hindisaha cusub uu yareynayo farqiga u dhaxeeya Israel iyo Xamaas. Bayaanka waxaa lagu caddeeyay in haddii la aqbalo soo jeedinta cusub ay si degdeg ah u dhameystiri doonto heshiiska.
Dhammaan dhinacyada gobolka ma diidana in la soo afjaro dagaalkan, aan ka ahayn labada nin ee ugu xagjirsan Golaha Wasiirada Israel, kuwaa oo codkooda kaga faa’iideysanaya Raysal Wasaare Netanyahu, si dagaalka loo sii wado.
Wasiirka Amniga, Itamar Ben-Gvir iyo Wasiirka Maaliyadda, Bezalel Smotrich oo ka tirsan asxaabta midigta fog ee wax ka soo dhisay xukuumadda wadaagga ah ee Netanyahu uu hoggaamiyo ayaa wacad ku maray inay dumin doonaan xukuumadda, taasina ay tahay caqabadda ugu weyn ee hortaagan dhameystirka heshiiska xabad joojinta.
Mareykanka ayaa la filayaa in uu qaadi doono tallaabo ka dhan ah Wasiiradaasi, haddii ay dhinac ka noqdaan rabitaanka dunida inteeda kale, ee ah in la joojiyo dhiigga daadanaya, gargaarka bani’aadantinimo oo loo fasaxo dadka rayidka ah iyo sii deynta la haysteyaasha Israeliyiinta.
Safarkan ayaa noqonayo kiisii 9aad ee Blinken uu ku yimaado Bariga Dhexe, tan iyo bishii October, markaas oo colaaddan ay dib uga soo dhex cusboonaatay Israel iyo Falastiiniyiinta.