Wasiirka Arrimaha Dibadda Ingiriiska, David Lammy ayaa ku baaqay in la cambaareeyo Wasiirka Maaliyadda Israel, Bezalel Smotrich oo sheegay inay qiil u haystaan in gaajo loo dilo shacabka Falastiiniyiinta ee ku nool Marinka Gaza.
Wasiirka Maaliyadda Israel oo ka mid ah Wasiirada xagjirka ah ee wax ka soo dhisay Xukuumadda Raysal Wasaare Benjamin Netanyahu ayaa billihii u dambeeyay adkeynayay inaanan wax gargaar ahi loo fasixin dadka reer Gaza, ciidamaduna ay sii wadaan dilka ay ku hayaan, isagoona ka digay in xukuumadda uu hoggaamiyo Netanyahu ay aqbasho heshiiska xabad joojinta ee Mareykanka uu taageerayo, haddii kalena ay xukuumaddiisa ridi doonaan.
Wasiirka mayalka adag ayaa Isniintii sheegay in laga yaabo inay gaajo u dilaan in ka badan laba milyan oo qof oo ku nool Gaza, si ay u soo furtaan la haysteyaasha Israeliyiinta ee halkaasi lagu haysto, waana xilli ay macluusha ku baaheyso qaybaha Marinka Gaza oo dhan.
David Lammy, Wasiirka Arrimaha Dibadda Ingiriiska ayaa si adag uga falceliyay warkan ka soo yeeray Smotrich, isagoona sheegay inay dembi dagaal tahay in gaajeysiinta loo adeegsado, sida hub oo kale.
Wasiirka ayaa sheegay inay dembi dagaal tahay in la gaajeysiiyo dad aan waxba galabsan, si loo sii daayo maxaabiis.
“Dadka oo si ula kac ah loo gaajeysiiyo waa dembi dagaal.” Ayuu yiri Wasiirka Arrimaha Dibadda Ingiriiska.
Wasiirka ayaa muujiyay in hadalka Smotrich uu xadgudub ku yahay xeerarka caalamiga ah, mabaadii’da bani’aadantinimada iyo qiyamka aasaasiga ah ee aadanaha.
“Ma jirto sabab loogu cudurdaari karo hadalka Wasiir Smotrich, waxaana filaynaa in Dowladda Israel ay hadalkiisa ka noqoto, oo ay cambaareyso.” Ayuu yiri Lammy.
Ingiriiska ayaa dib u eegis ku sameynaya siyaasaddiisii arrimaha dibadda ee ku wajahneyd Israel, tan iyo markii nidaamka cusub uu la wareegay talada dalkaasi.
Ingiriiska iyo Israel ayaa waxaa muuqata in ay ku kala fogaanayaan colaadda Gaza, ka dib markii Xisbiga Shaqaalaha UK uu ku guuleystay doorashadii dhawaan ka dhacday dalkaasi.
Xukuumadda cusub ayaa 19-kii bishii July ku dhawaaqday in London ay dib u bilaabi doonto dhaqaalihii ay ku taageerayeen Hay’adda Qaramada Midoobey U Qaabilsan Gargaarka & Arrimaha Qaxootiga Falastiiniyiinta ee (UNRWA), oo dhaqaalaha laga joojiyay bishii January, ka dib markii Israel ay sheegtay in 12 ka mid ah Shaqaalaha UNRWA ay ka qayb qaateen weerarkii Xamaas ay 7-dii bishii October ka gaysatay dhulka ay maamusho, ha yeeshee aan wax caddeymo ah loo helin, sida ay xaqiijiyeen guddigii ay Qaramada Midoobey u xilsaartay inay soo baaraan.
Toddobaadkan, Warbaahinta Ingiriiska ayaa sheegtay in xukuumaddu ay gebi ahaanba joojisay kaalmadii militari ee la siinayay Israel, sababo ku aaddan kororka dhimashada iyo dhaawaca faraha badan ee shacabka Falastiiniyiinta.
Dilka iyo gaajeysiinta ay Israel ku hayso dadka reer Gaza ayaa qayb ka ah hawlgalka ay kula dagaalameyso kooxaha wax iska caabinta Falastiiniyiinta, laakiin Tel Aviv ayaa cambaareyn xoog leh kala kulantay bulshada caalamka qaabka ay dagaalkeedan u waddo.
Saraakiisha Qaramada Midoobey ayaa ku celceliyay in dagaalka Israel uu liddi ku yahay xeerarka caalamiga ah ee bani’aadantinimada iyo kan dagaalka.